Aýylda óner mektebi ashyldy - Almaty oblysy
Saryózek aýylynda 4,5 myńdaı oqýshy bolsa, solardyń 3 myńy osy óner mektebine keletin bolady. Jańa shańyraqqa oblys bıýdjetinen 300 mln teńgeden astam qarajat bólindi. Bul jerde oqýshylar beıneleý ónerine mashyqtanyp, bı bılep, túrli aspaptarda oınap úırenedi.
«Osy óner mektebine kelgenime qýanyshtymyn. Men bul óner mektebine beıneleýden qatysamyn. Mektepke sýretti salýdy jaqsy kórgendikten keldim. Osy óner mektebinde ózimniń baǵymdy synap kóreıin dep keldim», - dedi oqýshy Aızere Zýfar.
Saryózek aýylynda ashylǵan óner mektebi daryndy balalardyń talabyn shyńdaıtyn óńirdegi 40-shy shańyraq. Óner mektebi 40-qa jýyq adamdy jumyspen qamtydy. Olardyń jartysynan astamy muǵalim. Ustazdar ózderiniń ónerin ata-analar aldynda pash etip, ózderiniń kil myqty maman ekenin kórsetti.
«Osy 40 mekemege 2 mlrd teńge qarajat salyp otyrmyz. Endigi jyly kásipkerlerdi shaqyrsaq, onda taǵy eki mlrd sonymen 4 mlrd osy qosymsha bilim berý uıymdaryna berip otyrmyz. Bul úlken kórsetkish, úlken jaqsylyq dep oılaımyn»,- dedi Almaty oblystyq bilim basqarmasy basshysynyń mindetin atqarýshy Jańyl Súleımenova.
Jýyrda dál osyndaı óner mektebi Raıymbek aýdanynda da ashylmaq. Jalpy oblys boıynsha oqýshylardyń 71 paıyzy qosymsha bilim berý mekemelerinde tálim alady.
