Aýylda myńdaǵan adam óz kásibin asha alady - Prezıdent

  ASTANA. QazAqparat - Memleket basshysy Nursultan Nazarbaev shaǵyn nesıelerge qosymsha 20 mlrd teńge bólýdi tapsyrdy, dep habarlaıdy QazAqparat tilshisi.

«Osylaısha, shaǵyn nesıelendirý kólemi 62 mıllıardqa jetetin bolady. Ásirese, aýyldy jerlerde. Jalpy, aýylda ǵana emes, barlyq jerde adamdar óz bıznesin asha alady. Sonyń arqasynda shaǵyn nesıelendirýdiń kólemi 14 myń adamdy qamtıtyn bolady. Bul ótken jylmen salystyrǵanda eki esege artyq. 14 myń adam ol az emes. Sebebi bir adamnyń qaramaǵynda úsh-tórt, on, bálkim, elý adam jumys isteıtin bolady. Bunyń barlyǵyn qosqanda, myqty shaǵyn bıznes shyǵady. Soǵan qoldaý jasaýymyz qajet», - dedi N.Nazarbaev Parlament palatalarynyń birlesken otyrysynda.

Prezıdenttiń aıtýynsha, shaǵyn nesıelerdi qarjylandyrý kólemin arttyrýdyń arqasynda aýyldyń jaǵdaıyn kóterýge bolady. «Iá, atalǵan bastama, ásirese, aýyldy jerler úshin asa mańyzdy. Sebebi ol jerde kásipkerlik damıdy, myńdaǵan adam óz bıznesin júrgize alady», - dep atap kórsetti Memleket basshysy.

Resmı aqparatqa sáıkes, ótken jyly respýblıka boıynsha 7,2 myń shaǵyn nesıe berilgen bolatyn. Atalǵan nesıelerdiń jalpy somasy 32 mlrd teńgeni qurady.

Foto: kazarchives.kz