Aýylda medıtsınalyq qyzmettiń sapasy tómen - Densaýlyq mınıstrligi

ASTANA. QazAqparat - QR Densaýlyq saqtaý vıtse-mınıstri Lıazzat Aqtaevanyń aıtýynsha, elimizde medıtsına mamandarynyń kásibı daıyndyǵy kóńil kónshitpeıdi. Ásirese, aýyldy jerlerde medıtsınalyq qyzmettiń sapasy tómen, dep habarlaıdy QazAqparat tilshisi.

«Osyǵan baılanysty búginde sheteldiń joǵary oqý oryndarymen birlese otyryp, elimizdiń medıtsınalyq bilimin jańǵyrtý sharalary qolǵa alynyp jatyr. Medıtsınalyq oqý oryndarynyń strategııalyq seriktesteri anyqtaldy. Qazirgi kezde bes jyldyq damý jospary daıyndalýda. Fınlıandııanyń tájirıbesi negizinde bakalavrıat boıynsha medbıkelik bilimdi jańǵyrtý sharalary da qolǵa alyndy. Búginde alty kolledjde pılottyq joba aıasynda 320 adam dáris alýda», - dedi L.Aqtaeva búgin Úkimette ótken baspasóz máslıhatynda. Alaıda dáris alyp jatqandardyń barlyǵy birdeı aýylǵa barmaıdy. Sebebi olardy mindetti túrde aýyldyq jerlerge jiberý qarastyrylmaǵan.
QR Densaýlyq saqtaý mınıstrligi jobalardy basqarý departamentiniń dırektory Tımýr Sultanǵazıevtiń sózine qaraǵanda, jańa júıe boıynsha bilim alyp jatqan mamandar aýylǵa bara ma, joq álde qalada qala ma ony ózderi sheshedi. «Negizi, jergilikti bılik, ıaǵnı ákimdikter medıtsınalyq kolledjdermen baılanys ornatyp, mamandardy ózderine shaqyra alady. Sóıtip, aýyldyń medıtsınasyn kóterýge múmkindik bar. Sosyn qazirgi fın modeli boıynsha qolǵa alynǵan sharalar bolashaqta barlyq respýblıkaǵa taralady. Demek, ol tájirıbe aýylǵa da jetedi», - dep atap kórsetti T.Sultanǵazıev.