Aýylda maldan túsetin tabysty esepteý qaıtadan qaralady - Berdibek Saparbaev
Aıta keteıik, búginde ataýly áleýmettik kómektiń jańartylǵan formaty boıynsha ótinish qabyldaý aıasynda tıisti komıssııalar jumys istep jatyr.
«Biz jergilikti ákimshilikterde aıtqan bolatynbyz, komıssııany qurǵan kezde adamdar kóp bolýy kerek. Ásirese, komıssııa aýyldyq jerlerde qandaı tabys bar ekenin aıtady. Óńirlerge barǵanda tıisti usynystardy estip júrmiz, osy oraıda tıisti normany qaıtadan qaraıtyn bolamyz. Bizdiń oıymyzsha, bir jylqydan nemese sıyrdan túsetin tabys qaıtadan qarastyrýdy talap etedi. Qazir Premer-Mınıstrdiń bizge bergen tapsyramys bar, bul turǵyda Eńbek jáne áleýmettik qorǵaý, Aýyl sharýashylyǵy jáne Qarjy mınıstrligi atalǵan normany pysyqtap, ózgeris engizemiz», - dedi Berdibek Saparbaev elordada tilshilerdiń saýalyna jaýap bere otyryp.
Budan buryn habarlanǵandaı, bıylǵy jyldyń 1 sáýirinen bastap Ataýly áleýmettik kómektiń jańartylǵan formaty aıasynda, ıaǵnı respýblıka boıynsha 21 myń teńgelik járdemaqyny taǵaıyndaýǵa ótinish qabyldanýda.
Osy oraıda búgin QR Eńbek jáne áleýmettik qorǵaý mınıstri Berdibek Saparbaev elordadaǵy Halyqty jumyspen qamtý ortalyǵynda jınalǵan turǵyndarmen kezdesti.
Ataýly áleýmettik kómektiń bul túri turmysy tómen barlyq otbasylarǵa beriledi. Bir úıdi tabysyn eseptegende tek jaqyn týystardyń bir aıda tabatyn aqshasy ǵana eskeriledi. Olardyń ishinde ata-analar, balalar, ákesi bir, sheshesi bólek aǵaıyndar, ata-ájeler bar. Bul degenimiz, osy adamdar birge tursa, olardyń tabysy bir otbasynyń kirisi retinde sanalady. Qosalqy sharýashylyq ta kiristiń kózi bolyp esepteledi.
Alaıda basqa áleýmettik tólemder esepke alynbaıdy. Sonyń ishinde kópbalaly otbasynyń qazirgi memlekettik járdemaqysy (4,16 AEK - 10 504 teńge), «Kúmis alqa» men «Altyn alqanyń» tólemaqysy (6,4 AEK - 16 160 teńge), múgedek balalardyń járdemaqysy men stıpendııalar bar.
