Aýylda qyzmetkerine úı salyp bergen jumys berýshiniń shyǵynyn Indýstrııa mınıstrligi sýbsıdııalaıdy

ASTANA. QazAqparat – «Indýstrııa jáne ınfroqurylymdyq damý mınıstrliginiń keıbir máseleleri týraly» Úkimet qaýlysy ashyq talqyǵa shyǵaryldy, dep habarlaıdy QazAqparat tilshisi.

Ashyq NQA portalynda jarııalanǵan Úkimet qaýlysynyń jobasynda jazylǵandaı, endi Indýstrııa jáne ınfroqurylymdyq damý mınıstrligine myna ókilettikter berilmek:

- aýylda, kentte, aýyldyq okrýgte jalǵa beriletin turǵynjaı salǵan jumys berýshilerdiń shyǵyndaryn sýbsıdııalaý qaǵıdalaryn ázirleıdi jáne bekitedi:

- aýylda, kentte, aýyldyq okrýgte jalǵa beriletin turǵynjaı salǵan jumys berýshilerdiń shyǵyndaryn sýbsıdııalaýdy júzege asyrady.

Aıta keteıik, buǵan deıin atalǵan vedomstvoda mundaı fýnktsııa bolmaǵan edi.

Úkimet qaýlysy 20 maýsymǵa deıin kópshilik talqylaýda bolady. Keıin qol qoıý úshin Premer-Mınıstrge joldanady.

Buryn habarlaǵanymyzdaı, endi aýyldyq eldi mekende óz jumyskerleri úshin úı salyp bergen jumys berýshilerdiń 50 paıyz shyǵyny sýbsıdııalanady.