Aýylda kópqabatty turǵyn úı paıdalanýǵa berildi - Aqmola oblysy
KÓKShETAÝ. QazAqparat - Aqmola oblysynyń Astrahanka selosynda jańa kópqabatty turǵyn úı paıdalanýǵa berildi, dep habarlaıdy QazAqparat tilshisi.
Táýelsizdik kúni qarsańynda baspana alyp, shattyqqa bólengenderdi Astrahan aýdanynyń ákimi Nurlan Seıilov quttyqtap, saltanatty jaǵdaıda jańa páterlerdiń kiltterin tapsyrdy.
"Bizdiń memleketimiz Elbasy Nursultan Ábishuly Nazarbaevtyń basshylyǵymen ár qazaqstandyqty turǵyn úımen qamtamasyz etý maqsatynda kóptegen baǵdarlamalardy, sonyń ishinde memlekettik baǵdarlamalardy da iske asyryp keledi. «Nurly jer» baǵdarlamasy boıynsha bizdiń aýdanǵa osy úıdiń qurylysyn júrgizýge 270 mıllıon qarjy bólingen bolatyn. Búgin úı tolyq salynyp bolyp, odan ata-analarynyń qamqorlyǵynsyz qalǵan jetim balalar, halyqtyń áleýmettik jaǵynan osal toptaryna jatatyn adamdar, memlekettik qyzmetshiler, bıýdjettik mekemelerdiń qyzmetkerleri páter alyp otyr, - dedi Nurlan Seıilov.
Sonymen birge, jańa úıge qonystanýshylardy quttyqtaǵan aýdandyq ardagerler keńesiniń tóraǵasy Saǵynaı Seıitjanov aýdan ákimimen birge kógildir lentany qıdy.
Saltanatty jıynda sóz sóılegen turǵyndar memleketimizdiń ózderine kórsetken qamqorlyǵy úshin alǵystaryn bildirip, sheksiz qýanysh, izgi nıetpen jańa páterlerine qadam basty.
