Aýylda bıznes ashý: Bir adamǵa qansha aqsha beriledi
ASTANA. QazAqparat - Bıyl shaǵyn jáne orta bıznesti damytý úshin qosymsha 20 mlrd teńge bólinedi. Atalǵan qajyny úılestirý mindeti QR Eńbek jáne halyqty áleýmettik qorǵaý mınıstrligine júktelgen, dep habarlaıdy QazAqparat tilshisi.
«Búginde jappaı kásipkerlikti damytý jáne nátıjeli jumyspen qamtý baǵdarlamasy bar. Sonyń aıasynda halyqqa bıznesti ashý úshin jeńildetilgen sharttarmen nesıe berý qarastyrylǵan. Atap aıtqanda, qazirgi kezde 18 mln teńgege deıin nesıe alýǵa múmkindik bar. Osy aqsha bes jylǵa beriledi. Al aýyl sharýashylyǵyna berilgen nesıelerdiń merzimi - 7 jyl. Jyldyq mólsherleme 6 protsentten aspaýy tıis», - dedi eńbek naryǵyn damytý jáne halyqty jumyspen qamtý departamenti dırektorynyń orynbasary Erbolat Ábilhatın Astanada ótken baspasóz máslıhatynda.
Onyń aıtýynsha, bastapqyda aýyldyq jerlerde nesıege kepildik berý máselesi qıyn boldy. Byltyr atalǵan másele sheshildi. Endi, bıznesti birinshi ret bastap otyrǵandar úshin nesıeniń 80 protsentine memlekettiń ózi kepildik beredi. Al bıznesti ary qaraı jalǵastyratyn kásipkerler 50 protsenttik kepildikti ala alady. «Máselen, byltyr 7 200 adam shaǵyn nesıe aldy. Sonyń ishinde 6 791-si - aýyldyń halqy, qalǵany - qala turǵyndary. Al bıznesin jańadan bastaǵandardyń sany 4 127 adamdy qurady», - dep atap kórsetti E.Ebilhatın.
Aıta keteıik, QR Prezıdenti Nursultan Nazarbaevtyń bes áleýmettik bastamasy shaǵyn nesıelendirýdi keńeıtý mindeti qoıylǵan bolatyn. Atap aıtqanda, Memleket basshysy shaǵyn nesıelerge qosymsha 20 mlrd teńge bólýdi tapsyrdy.
«Osylaısha, shaǵyn nesıelendirý kólemi 62 mıllıardqa jetetin bolady. Ásirese, aýyldy jerlerde. Jalpy, aýylda ǵana emes, barlyq jerde adamdar óz bıznesin asha alady. Sonyń arqasynda shaǵyn nesıelendirýdiń kólemi 14 myń adamdy qamtıtyn bolady. Bul ótken jylmen salystyrǵanda eki esege artyq. 14 myń adam ol az emes. Sebebi bir adamnyń qaramaǵynda úsh-tórt, on, bálkim, elý adam jumys isteıtin bolady. Bunyń barlyǵyn qosqanda myqty shaǵyn bıznes shyǵady. Soǵan qoldaý jasaýymyz qajet», - dedi N.Nazarbaev Parlament palatalarynyń birlesken otyrysynda.
Foto: projectrussia.ru
