Aýylda baspana salǵan jumys berýshilerge shyǵynnyń 50 paıyzy tólenedi

NUR-SULTAN. QazAqparat – Indýstrııa jáne ınfraqurylymdyq damý birinshi vıtse-mınıstri Qaıyrbek Óskenbaev aýyldy jerde óz qyzmetkerlerine baspana salǵan jumys berýshilerge qurylys shyǵyndarynyń 50 paıyzyn sýbsıdııalaý qalaı iske asatynyn túsindirdi, dep habarlaıdy QazAqparat tilshisi.

«Sondaı-aq, aýylda turǵyn úı salý tetigin engizýdi usynyp otyrmyz. Bul tetik boıynsha Memleket basshysynyń tapsyrmasyna sáıkes aýyldarda qyzmetkerler úshin turǵyn úı salý kezinde jumys berýshi shyǵyndarynyń 50%-yn sýbsıdııalaý kózdelgen. ıAǵnı, jumys berýshiler sol aýylda ózine qajet mamandarǵa úı salý úshin aqsha jumsaımyn dese, jergilikti ákimshilikterge tizimin beredi. Ákimshilikter ol tizimdi bizge joldaıdy. Biz ol jobalardy teksergennen keıin ruqsat beremiz. Osylaısha aýylda jumys berýshi azamattar óz qyzmetterine úı salǵannan keıin oǵan ketken shyǵynnyń 50 paıyzyn memleket sýbsıdııa arqyly qaıtaryp beredi», - dedi vıtse-mınıstr ortalyq kommýnıkatsııalar qyzmetinde.

Onyń aıtýynsha, qazirgi tańda 76 aýdanda 2 855 turǵyn úıge qajettilik bar. ıAǵnı olardyń qurylysyn sýbsıdııalaý úshin respýblıkalyq bıýdjetten 14,3 mlrd. teńge bólý qajet.

Osy sharada vıtse-mınıstr baspana kezegindegilerdiń turǵyn úı jaldaý shyǵyny qalaı sýbsıdııalanatynyn túsindirgen bolatyn.

Qaıyrbek Óskenbaevtyń aıtýynsha, budan bylaı baspana kezeginde bazaǵa qaıta engizýge jol berilmeıdi.