Aýylda baspana qurylysyn damytatyn baǵdarlama qajet – Senat depýtaty
«Memleket basshysynyń saılaýaldy baǵdarlamasy boıynsha, aldaǵy jeti jyldyń ishinde 11 mln sharshy metr baspana salynýy kerek. Naryqtaǵy jaǵymdy tendentsııa halyqty baspanamen qamtý kórsetkishin 2018 jylmen salystyrǵanda 5,9% jaqsartýǵa múmkindik berdi.
Alaıda tabandy ósimge qaramastan, qazaqstandyqtardy baspanamen qamtý deńgeıi ózekti másele kúıinde qalyp otyr. Óıtkeni Birikken ultttar uıymynyń standarty boıynsha, bir adamǵa qajetti baspana aýdanynyń normasy 30 sharshy metr bolý kerek. Bul bizdiń eldegi deńgeıden áldeqaıda joǵary - 23,2 sharshy metr. Halyqaralyq tájirıbe qurylys eldegi búkil ekonomıkany alǵa jeteleıtin sala ekenin kórsetip otyr. Bul zańdylyq bizdiń elge de tán. El ekonomıkasynyń negizgi draıveriniń biri qurylys salasy bolyp otyr», - dedi depýtat.
Onyń málimeti boıynsha, qurylys salasynyń eldiń jalpy ishki ónimdegi úlesi 6%-dan sál asady.
«Al BUU Eýropa ekonomıkalyq komıssııasynyń deregi boıynsha, atalǵan kórsetkish 2010 jyly elimizde 8% bolǵan eken. Onyń ústine osy kórsetkish jóninen Qazaqstan TMD-nyń Ázerbaıjan, Armenııa sııaqty memleketterinen, Baltyq jaǵalaýy elderinen keıin tur.
2021 jylmen salystyrsaq, qyrkúıek aıynda qurylys salasynyń Ulttyq bank túzgen iskerlik belsendilik ındeksi 50,21%-dan 46,25%-ǵa deıin túsken. Halyq sanynyń ósýi men ýrbanızatsııa udaıy ósip kele jatqanyn eskersek, turǵyndardy baspanamen qamtý máselesi ýshyǵýy múmkin.
Qazir halyqtyń 41%-y aýylda turyp jatyr. Biraq aýyldaǵy halyq sanynyń ósýi qaladaǵy ósimnen áldeqaıda tómen. 2011 jyldan 2021 jylǵa deıin qala halqynyń sany 24,2% ósse, 3,6% ǵana artqan. Bul birinshi kezekte aýyldaǵy baspana qurylysyn damytýǵa baǵyttalǵan bir de bir baǵdarlamanyń bolmaýymen baılanysty. Osy tendentsııany eskersek, baspana máselesi memlekettiń áleýmettik saıasatynyń basym baǵyty bola bermek», - dedi Olga Perepchına.
