Aýylda asfalt zaýyty salynyp jatyr - Aqmola oblysy
KÓKShETAÝ. QazAqparat - Aqmola oblysynyń Jarqaıyń aýdanynda asfalt zaýytynyń qurylysy júrgizilýde, dep habarlaıdy QazAqparat tilshisi óńirlik kommýnıkatsııalar qyzmetine silteme jasap.
Bul zaýyt negizinen «Jezqazǵan - Petropavl» respýblıkalyq mańyzdaǵy tas jolyn qalpyna keltirý jobasy aıasynda júzege asyrylýda. Merdigerler zaýytty shilde aıynyń sońynda iske qosýdy josparlap otyr.
Jańadala aýyldyq okrýginde zaýyttyń qurylysyna 1 gektar jer telimi arnaıy bólingen. Óńirdiń órkendeýine serpin beretin ınvestıtsııalyq jobanyń quny 100 mıllıon teńge. Munda saǵatyna 100 tonna ónim óndiriledi. Merdigerlik uıym «StroıTehResýrs» JShS qurylys jumystarynda jergilikti 10 adamdy eńbekpen qamtyp otyr. Olardyń barlyǵy da zamanaýı qondyrǵyda jumys isteýdiń qyr-syryn úırenýde.
Jańadala aýyldyq okrýginiń ákimi Kóketaı Hamzınniń aıtýynsha, kásiporynda óndirilgen asfalt osy mańdaǵy joldardy jóndeýge jumsalmaq. Bul ýaqytty, ári qarjyny únemdeýge mol múmkindik beretin kórinedi.
«Aýylymyzda osyndaı keshenniń ashylyp, turǵyndardyń jumyspen qamtylýy aýyldyń damýyna jańa lep beredi degen oıdamyz. Birneshe jyldar boıy aýyldastarymyz joldyń taýqymetin tartqan edi. Endi mine, turalap qalǵan tas jolǵa jan bitip, jol qatynasy jandana túspek. Osy joldy jóndeýge óz asfaltymyzdy paıdaǵa asyratynymyz kóńilge qýanysh syılaıdy», - deıdi okrýg ákimi.
