Aýyl joldarynyń 85 protsentin jaqsartamyz - mınıstr
ASTANA. QazAqparat - QR Investıtsııalar jáne damý mınıstri Jeńis Qasymbek respýblıkalyq mańyzy bar joldardy jóndeý boıynsha úlken mindetti alyp otyr. Budan bólek, aýyl joldarynyń biraz bóligin jaqsartý josparlanǵan, dep xabarlaıdy QazAqparat tilshisi.
Mınıstrdiń aıtýynsha, bıyl «Nurly joldyń» 23 jobasy aıasynda barlyq aımaqtarda respýblıkalyq mańyzy bar 4 200 shaqyrym joldar jańadan tóseledi, ıa bolmasa, kúrdeli jóndeýden ótetin bolady.
«Biz ondaı jumystyń kólemin alǵash ret alyp otyrmyz. Osynyń nátıjesinde 2020 jylda respýblıkalyq mańyzy bar joldardyń 90 protsenti «jaqsy» jáne «qanaǵattanarlyq» jaǵdaıda bolady. Al I jáne II texnıkalyq sanattarǵa jatatyn joldardyń úlesi 50 protsentke deıin artatyn bolady», - dedi J.Qasymbek búgin otandyq kólik-logıstıka keshenin damytý máselelerine arnalǵan respýblıkalyq keńeste.
Budan bólek, oblystyq jáne aýdandyq mańyzy bar joldardy salý máselesine basa nazar aýdarylady. Qazirgi kezde mınıstrlik ákimdiktermen birlese otyryp, atqarylatyn sharalardyń josparyn pysyqtap jatyr.
«Jergilikti joldardy ortasha jóndeý jumystaryna negizgi basymdyq beriledi. Atalǵan sharalar kezinde resaıklıng (ondaıda joldyń ústińgi betin qyryp alady da, arasyna bıtým jáne taǵy basqa zattardy qosyp, qaıtadan tóseıdi - avt.) jáne dástúrli texnologııalar qoldanylady. Osyǵan oraı, jergilikti jerdegi joldardy jóndeý jumystaryn qarjylandyrý kólemin jylyna 150 mlrd teńgege deıin jetkizý kózdelip otyr. Sonyń arqasynda shamamen 5 000 shaqyrym joldy jóndep otyrýǵa múmkindik bar. Al 2025 jylǵa deıin jergilikti joldardyń 85 protsentin jaqsartýǵa bolady», - dep atap kórsetti J.Qasymbek.
Aıta keteıik, búgingi keńes kezinde QR Premer-Mınıstriniń birinshi orynbasary Asqar Mamın konteınerlik tranzıtti ózge elderde uıymdastyrý máselesine basa nazar aýdardy.
