Aýyl jastaryn «Bolashaqpen» kóbirek oqytý usynyldy
ASTANA. QazAqparat - «Aýyl» xalyqtyq-demokratııalyq patrıottyq partııasy «Bolashaq» baǵdarlamasymen aýyl jastaryn kóbirek oqytýdy usynyp otyr, dep xabarlaıdy QazAqparat tilshisi.
Partııa basshysy Álı Bektaevtyń aıtýynsha, búginde «Bolashaq» xalyqaralyq baǵdarlamasy aıasynda shetelde bilim alyp jatqan jastar kóp. Biraq aýyldyń jastary tym az. Aýyl sharýashylyǵy boıynsha oqyp jatqandar da sanaýly.
«Negizi, patrıot jastardyń kóbisi aýylda turady. Ony moıyndaýymyz qajet. Al aýyl mektepterindegi bilim sapasynyń tómendigi, bolmasa, muǵalimderdiń aýylǵa barmaıtyndyǵy - bunyń bári aýyl jastarynyń kinási emes qoı. Solaı emes pe? Balalar kimnen bilim alady, sol bilimmen oqıdy, sol bilimmen oqýǵa túsýge tyrysady. Sosyn aýyl balasy qaldaǵy balalardan esh kem emes. Aqyly jaǵynan, parasaty jaǵynan, al patrıottyǵy qala jastarynan da artyq. Biraq olardyń «Bolashaqtyń» talabyna saı bilimi men daıyndyǵy jetispeı jatady. Nazarbaev ýnıversıtine túskisi keletin jastardyń jaǵdaıy da solaı. Talaptary joǵary. Biraq oqýǵa qabyldaý tártibi óte qatal. Tipti, qala túlekteriniń ózi elimizdiń eń bedeldi ýnıversıtetiniń stýdenti ataný úshin qosymsha jeke menshik ortalyqtarǵa baryp, jyl on eki aı daıyndalyp júredi. Al aýyl balasynda ondaı múmkindik joq», - dedi Á.Bektaev partııanyń kezekten tys XIV sezinde. 
Onyń aıtýynsha, búginde muǵalimderdiń biliktiligi bylaı tursyn aýyl mektepteriniń oqý-ádistemelik ári materıaldyq bazasy qalalyq mektepterimen salystyrýǵa da kelmeıdi. Zamanaýı qural-jadyqtardy paıdalaný jaǵynan da aýyl mektepteriniń múmkindikteri shekteýli.
«Sondyqtan biz birneshe usynysty ázirledik. Birinshiden, Nazarbaev zııatkerlik mektebine túsý úshin aýyl mektepteriniń 6-shy synybyn bitiretin oqýshylarǵa arnaıy daıyndyq kýrstaryn uıymdastyrý qajet. Ekinshiden, aımaqtardaǵy Nazarbaev zııatkerlik mektepterine qabyldaý barysynda aýyl balalaryna kvota bólý kerek dep esepteımiz. Úshinshiden, Nazarbaev ýnıversıtetine, bolmasa, «Bolashaq» baǵdarlamasy boıynsha sheteldegi aldyńǵy qatarly ýnıversıtetterge túsý úshin arnaıy synaqtan ótken aýyldyń túlekterine daıyndyq kýrstaryn uıymdastyrǵan durys. Aýyldyń balalaryna da laıyqty jaǵdaı jasalýy qajet», - dep atap kórsetti Á.Bektaev.
