Aýyl jastarymen júzdesýde aıaq sý, tyńaıtqysh, ónim ótkizý máselesi talqylandy
Elimizde óńirlerdi damytý baǵytynda naqty ister júzege asyp keledi. Osy maqsatta Memleket basshysynyń tapsyrmalarynan týyndaıtyn mindetterdi naqtylaý – Senat jumysyndaǵy negizgi basymdyqtardyń biri. Jergilikti jerlerdegi túıindi máselelerdi túbegeıli sheshýde aýyl adamdarynyń usynys-pikirleri óte mańyzdy ekeni belgili.
Prezıdenttiń erekshe ekpin bergen ekonomıkanyń basym baǵyttarynyń biri – aýyldyq jerlerdi damytý. Memleket basshysy «Aýyldyq aýmaqtardy damytý máselesi týraly» Jarlyǵyn qabyldady. Bul Parlamentke de úlken jaýapkershilik júkteıdi.
«Senat Tóraǵasynyń bastamasymen qurylǵan «Óńir» depýtattyq tobynyń basty jumys baǵyty da – aımaqtarmen ózara baılanysty nyǵaıtyp, zań shyǵarýshylyq salasyna jergilikti máslıhat depýtattaryn qatystyrý. Sapar barysynda Májilis depýtattary Murat Ergeshbaev jáne Marhabat Jaıymbetovpen birge birqatar eldi mekenderdi aralap, el azamattarymen kezdesti. Aldymen aýdan ortalyǵynan alshaq jatqan Aıdarly aýyly aýmaǵyndaǵy egis dalasynda jastardyń eńbek brıgadasy jumysyna nazar aýdaryldy. Brıgadada 20 adam jumys isteıdi. Eńbekke epti, beınetke beıil azamattar jerdiń berekesine barynsha yqylas qoıǵan. Al olardy tolǵandyratyn másele – jyldan-jylǵa kólemi artyp kele jatqan egistik jerdi turaqty aıaq sýmen qamtý, tyńaıtqysh jetkizý jáne óndirgen ónimderin bolashaqta tıimdi baǵaǵa ótkizý.
Árıne, bolashaqta aıaq sýdan tapshylyq kórmeı, ony jetkilikti kólemde turaqty jetkizý múmkindigi eń áýeli darııadaǵy sýdyń deńgeıine baılanysty. Bul – úlken suranystaǵy úmit. Ekinshi kezekte kanaldardy tazalaý jáne tehnıkalyq qurylǵylardy jóndeýden ótkizý de kúttirmeıtin másele. Syrdarııa sýynyń búgingi jaıy belgili. Muny erte bastan eskergen aıdarlylyq azamattardyń sýdy az qajet etetin jáne ekonomıkalyq turǵyda tıimdi daqyldardy kóptep egýge degen betburystary qýantty», - dedi Rýslan Rústemov.
Onyń aıtýynsha, qazirgideı qymbatshylyq pen baǵa turaqsyzdyǵy keýdeden qysyp turǵan kezeńde syrttan kókónis, baqsha ónimderin tasymaldamaýǵa negiz joq. Ony ózimizde óndirý úshin aýyldyq eldi mekenderdegi jumys jasaýǵa nıeti bar, eńbek etýge epti, talapty jastardyń osyndaı naqty bastamalaryn Úkimet árdaıym qoldap, qýattaýy qajet.
«Sharýaqor jastardyń nazaryna aldaǵy ýaqytta Parlamentte «Sý kodeksi týraly» jańa zań jobasyn qabyldaý josparlanǵanyn jáne oǵan engizýge qajetti naqty usynystaryn tıisti memlekettik organdarmen birlesip qaraýǵa daıyn ekenimizdi jetkizdik. Jalpy aýdanda budan bólek taǵy 6 aýylda osyndaı jastar brıgadasy qurylǵan. Olardyń quramynda jumyssyz, NEET sanatyndaǵy, probatsııa esebinde turǵan 200-ge tarta jas paıdaly eńbekke tartylǵan. Bólingen 60 gektarǵa jýyq jerdiń 35 gektaryna kartop, 25 gektaryna baqsha daqyldary egilgen. Mundaı málimet biz úshin mańyzdy», - deıdi Senat depýtaty.
Aýdandaǵy jumys sapary odan ári Aıdarly aýylynda jýyrda paıdalanýǵa berilgen eldi mekendi elektr jelilerimen jabdyqtaý, Qaljan ahýn aýylyndaǵy gazdandyrý, Qaljan ahýn, Asqar Toqmaǵambetov aýyldaryndaǵy feldsherlik akýsherlik pýnktterdi kúrdeli jóndeý, Tereńózek kentindegi jol jóndeý jumystarynyń barysymen tanysýmen jalǵasty. Sonymen birge Amangeldi aýylyndaǵy mádenıet úıinde jurshylyqpen kezdesý, aýdan ortalyǵynda azamattardy qoǵamdyq qabyldaý sharalary ótkizilgen.
