Aýyl jastary sportpen aınalysýy úshin tıisti jaǵdaılar tolyq jasalýy kerek
ASTANA. 22 aqpan. QazAqparat - Aýyl jastaryna jappaı sportpen aınalysýy úshin tıisti jaǵdaılar tolyq jasalýy kerek. Búgin QR Parlamenti Májilisiniń jalpy otyrysynda Úkimet basshysynyń atyna saýal joldap,
osy máseleni kótergen depýtat Turarbek Asanov Raıymbek aýdany ortalyǵynan «Jastar sport keshenin» salýǵa qoldaý surady.
«Elbasy Nursultan Nazarbaev salaýatty ómir saltyn nasıhattaýǵa, buqaralyq sport túrlerin damytýǵa erekshe kóńil bólinýi tıis ekendigin únemi aıtyp keledi. Qazirgi tańda sporttyń damytylýǵa tıisti salalary jetkilikti. Sonyń ishinde halyqtyń dene shynyqtyrýy jáne sportpen jappaı aınalysýy úshin sporttyq ınfraqurylymdardyń qoljetimdiligin keńeıtý memleketimiz úshin mańyzdy másele ekenin Elbasymyz «Áleýmettik-ekonomıkalyq jańǵyrtý - Qazaqstan damýynyń basty baǵyty» atty Qazaqstan halqyna arnaǵan Joldaýynda atap kórsetti. Aýyldarda sporttyń damýyna aıryqsha mán berilýi kerek dep oılaımyz. Óıtkeni bizdiń áıgili sportshylarymyzdyń basym bóligi aýyldan shyqqan túlekter. Ol úshin aýdan ortalyqtary men aýyldarda sport keshenderi salynýy qajet», - deıdi T. Asanov.
Onyń aıtýynsha, Almaty oblysynyń Raıymbek aýdanyndaǵy 54 eldi mekende 80 myńǵa jýyq turǵyn bar bolsa, onyń úshten biri jastar. Alaıda qazirgi ýaqytqa deıin aýdanda eshqandaı sport kesheni salynbaǵan. Biraq buǵan qaramastan sport salasynda joǵary jetistikterge jetken respýblıka maqtanyshyna aınalǵan áıgili sport sańlaqtary az emes.
«Aýyl jastaryna sportpen shuǵyldanýyna tolyq jaǵdaı jasasaq, erteńgi kúni elimizdiń kók týyn jelbiretetin sańlaq sportshylar solardyń ishinen shyǵatynyna kámil senemin. Sonymen qatar, jastardyń bos ýaqytynda sportpen aınalysýyna múmkindikter jasaý kerek. Osyǵan baılanysty Raıymbek aýdanynyń ortylyǵy Kegen aýlynda «Jastar sport keshenin» salý máselesi aldaǵy jyldyń josparyna engizilse ıgi», - deıdi depýtat.
