Aýyl xalqy jekeshelendirýden zardap shegip otyr - depýtattar
«Aýyl men aýdandarda jylý, sýmen qamtý, jol-eksplýatatsııalyq qyzmetter, medıtsınalyq jáne sport nysandaryn jekeshelendirý máselesi úlken alańdaýshylyq týǵyzady. Máselen, jol-eksplýatatsııalyq ýchaskeler men turǵyn úı kommýnaldyq qyzmetterdi alsaq, atalǵan nysandar kezinde jekeshelendirýge shyǵarylǵan edi. Alaıda onyń bári qırady, qurydy. Sodan ákimdikter qaıta óz ıelegine qaıtarýǵa májbúr boldy. Sonyń barlyǵyn qaıta satyp alýǵa týra keldi», - dedi V.Bojko jekeshelendirý máselelerine arnalǵan otyrysta.
Onyń aıtýynsha, osy joly jergilikti jerdegi kommýnaldyq kásiporyndar qaıtadan jekeshelendirýge shyǵarylyp otyr. Qazirgi kezde atalǵan kásiporyndardyń basym bóligin jeke menshikke satyp aldy, bolmasa, ońtaılandyryp tastady. «Ashyǵyn aıtý kerek, kommýnaldyq kásiporyndardyń shyǵyny kóp. Sol sebepti ondaı nysandardyń jańa ıeleri birden tólemaqyny kóterýge kirisedi. Alaıda xalyqtyń tólem qabilettiligin eskermeıdi. Jóndeý jumystaryn da júrgizbeıdi, texnıkany da jańartpaıdy. Aqyr aıaǵyna xalyq zardap shegedi. Máselen, jyldyń basynda Aqmola oblysy Zerendi aýdandaǵy Qonysbaı aýylynyń 900-deı turǵyny eki apta boıy sýsyz otyrdy. Sebebi sý qondyrǵysyn kásipker jekeshelendirip aldy. Al apattyq jaǵdaı kezinde tıisti jumystardy atqarmaǵan. Sol sııaqty Almaty oblysy Jambyl aýdanyndaǵy Qarǵaly aýylynda myńdaǵan adam sýsyz qaldy. Sol kezde «Qarǵaly Sý» mekemesiniń ıesi óz mindetin durys atqara almady», - dep atap kórsetti V.Bojko.
Depýtattyń sózine qaraǵanda, búginde oblys pen aýdan ákimdikteriniń kóbisi jylý, sýmen qamtý, jol-eksplýatatsııalyq qyzmetter, medıtsınalyq jáne sport nysandaryn jekeshelendirýmen asyqpaý qajet dep sanaıdy. Ortalyqqa tıisti xattardy da jazyp jatyr. Alaıda joǵary jaqtan naqty jaýap joq.
