Aýyl turǵynynyń úıinen qarý-jaraqtyń jasyryn qoımasy tabyldy

KÓKShETAÝ. QazAqparat – Aqmola oblysynda aýyl turǵynynyń úıinen qarý-jaraqtyń jasyryn qoımasy tabyldy, dep habarlaıdy QazAqparat Rolisia.kz-ke silteme jasap.

Ekstremızmge qarsy is-qımyl basqarmasynyń qyzmetkerleri Zerendi aýdanynyń Sadovoe aýylynda júrgizilgen jedel-izdestirý is-sharalarynyń nátıjesinde jergilikti turǵynnyń úıinen qarý-jaraqtyń jasyryn qoımasyn tapty.

«Atap aıtqanda, kalashnıkov AQSÝ-74 avtomaty, oǵan 5,45 mm kalıbrli 29 oq jáne 16 kalıbrli TOZ ańshylyq tegis uńǵyly myltyǵy tárkilendi.

Aýyl turǵynynyń aıtýynsha, oǵan avtomat pen oqtar qaıtys bolǵan dosynan, al myltyq ákesiniń murasynan qalǵan.

QR Qylmystyq kodeksiniń 287-baby 3-bóligimen sotqa deıingi tergeý bastaldy. Tárkilengen qarý ballıstıkalyq saraptamaǵa jiberildi. Tergeý aıasynda aqmolalyqtyń aıǵaqtary muqııat tekseriletin bolady», - delingen polıtsııa málimetinde.