Aýyl turǵynyn WhatsApp arqyly balaǵattaǵan ákim jazalandy
Aqtóbelik sheneýnikter aýyl turǵyndarymen, qyzmetkerlermen dóreki sóılesip, Ádep keńesine túsip jatyr. Buǵan deıin habarlaǵanymyzdaı, Aqtóbe oblystyq mádenıet basqarmasynyń basshysy Marjan Qorǵanbaeva, Aqtóbe qalalyq bilim bólimi bastyǵynyń orynbasary Rýslan Áljanov qyzmetkerlerdiń ar-namysyna tıetin sózder aıtyp, qoǵamnyń synyna ilikkeni úshin sógis aldy. Jyldyń alǵashqy jartyjyldyǵynda barlyǵy 26 memlekettik qyzmetshiniń tártiptik jaýapkershilikke tartylǵany belgili boldy.
«10 tártiptik is qaralyp, nátıjesinde 9 memlekettik qyzmetshi jaýapkershilikke tartyldy. Onyń tórteýi memlekettik qyzmettiń bedelin túsiretin teris qylyq kórsetip, beseýi Ádep kodeksiniń normalaryn buzǵan. Memlekettik qyzmet týraly zańnamanyń saqtalýy barysynda 20 tekseris jumysy júrgizilip, nátıjesinde 1551 quqyq buzýshylyq anyqtaldy. Sondaı-aq, osy atalǵan salaǵa quqyq buzýshylyqtardy joıý týraly 11 usynys engizildi jáne 17 memlekettik qyzmetshi tártiptik jaýapkershilikke tartyldy»,- dedi QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Aqtóbe oblysy boıynsha departamenti basshysynyń mindetin atqarýshy, Ádep jónindegi keńes tóraǵasy Rafhat Bısenov.
Aıta keteıik, Qarǵaly aýdany, Velıhov aýyldyq okrýginiń ákimi Aınagúl Halıýllına aýyl turǵyny J.Muhambetovaǵa beıádep sózder aıtyp, onyń ar-namysyna tıgen. Aýyl ákimi qyzmetine sáıkes emes dep eskertý aldy.
«Memlekettik qyzmet kórsetý salasynda 36 baqylaý júrgizildi. Nátıjesinde 2 myńnan astam zańbuzýshylyq anyqtaldy. Memlekettik qyzmetkerler qajet emes qujattardy talap etip, kásipkerlerge qyzmet kórsetý merzimin saqtamaǵan. Kóbine qujattandyrý, kólik jáne kommýnıkatsııa salalarynda, ıaǵnı, múlik jáne zııatkerlik menshik quqyǵynda zań buzýshylyqtar anyqtalyp, 18 laýazymdy tulǵa tártiptik jaýapkershilikke tartyldy», - dep habarlady Rafhat Bısenov.
