Aýyl turǵyny sómkesinen 20 mln teńgeniń áshekeı buıymdaryn urlatqan
TÚRKІSTAN. QazAqparat - Túrkistan oblysynyń turǵyny sómkesinen 20 mln teńgeniń áshekeı buıymdaryn urlatqan. Keles aýdanynda turatyn jábirlenýshi qymbat buıymdarynyń joǵalǵanyn úıine barǵanda bir-aq bilgen, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, zattary urlanǵan jergilikti turǵyn naýryz aıynyń sońynda Keles APB-ne aryzdanǵan. Onyń aıtýy boıynsha, jedel-tergeý toby qurylǵan.
«Qylmysty tez arada ashý úshin polıtseıler turǵyndar arasynda saýalnama júrgizip, bazarlarda qoıylǵan beınekameralardy tekserip shyqqan. Qajetti degen is-sharalardyń barlyǵyn derlik atqaryp, beınekameralardyń birinen kúdikti anyqtalǵan. Nátıjesinde sezikti «izin sýytpaı» ustaldy. Ol buryn sotty bolǵan Jetisaı qalasynyń turǵyny eken. Kúdiktini tekserý barysynda polıtseıler urlanǵan baǵaly buıymdardyń bir bóligin tárkiledi» delingen habarlamada.
Qalǵan zattardy kúdikti satyp, óz qajetine jaratyp jibergen. Aıǵaqty zat retinde tárkilengen baǵaly buıymdar zańdy ıesine qaıtaryldy. Qazirgi tańda atalǵan jaıt boıynsha QR Qylmystyq kodeksiniń 188-baby («urlyq») boıynsha SDTBT-ne tirkeýge alynyp, sotqa deıingi tekserý amaldary júrgizilýde.
Kúdikti qamaýǵa alynyp, onyń basqa da jaıttarǵa qatysy bar-joǵy anyqtalyp jatyr.
