Aýyl turǵyny sırek kezdesetin aǵan kóshetterin urlap, isti boldy
TALDYQORǴAN. QazAqparat - Almaty oblysy Talǵar aýdanynyń polıtseıleri urlanǵan 50 túp aǵash kóshetterin ıesine qaıtardy, dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, kezekshi bólimge Belbulaq kentiniń 42 jastaǵy turǵyny óz aýlasynan 50-ge jýyq sırek kezdesetin aǵash kóshetteri urlanǵany týraly aryzdanǵan. Ol aǵashtyń bul túrin Polshadan ákelgenin aıtqan.
«Bir saǵat ishinde kúdiktini ustap, kóshetterdi zańdy ıesine qaıtardyq. Kúdikti zardap shekken azamattyń 55 jastaǵy aýyldasy ekendigi anyqtaldy. Ol bul kóshetterdiń sırek, joǵary ónimdi tańqýraı túri ekenin bilip, óziniń jer ýchaskesine otyrǵyzý maqsatynda urlaǵandyǵy belgili boldy», - dedi Talǵar aýdandyq polıtsııa basqarmasynyń aǵa ýchaskelik ınspektory Saǵı Nurmahanov.
Bul derek QR QK-niń 188-baby boıynsha SDTBT-da tirkeldi. Kúdikti mekenjaıyn ózgertpeý týraly qolhatpen bosatyldy.
«Jumys barysynda kúndelikti túrli qylmystardy ashýǵa týra keledi. Olardyń basym bóligin urlyq derekteri quraıdy. Urlanǵan múlikti tapqan kezde aýyl azamattarynan shyn júrekten alǵys alamyz jáne bul biz úshin joǵarǵy marapat. Halyqqa qyzmet etý, bizdiń qasıetti boryshymyz ben paryzymyz», - dep tolyqtyrdy maıor Nurmahanov.
