Aýyl turǵyny blokposttan ótý úshin para usynǵan – Almaty oblysy
TALDYQORǴAN. QazAqparat – Almaty oblysynyń polıtsııa qyzmetkerleri blokposttan ótý úshin para usynǵan azamatty ustady, dep habarlaıdy QazAqparat tilshisi.
Oqıǵa 17 sáýirde Іle aýdanynda ornalasqan № 4 karantındik blokpostta bolǵan.
«Polıtsııa departamentiniń ózindik qaýipsizdik qyzmetine patrýldik polıtsııa batalonynyń ınspektory oǵan belgisiz er adamnyń Almaty oblysynan Almaty qalasynyń aýmaǵyna kedergisiz ótý úshin bes myń teńge kóleminde para bermek bolǵany týraly habarlaǵan. Saǵat 19.00 shamasynda bizdiń qyzmetkerler Baıserke aýylynyń 40 jastaǵy turǵynyn ustady», - dedi Almaty oblysy PD Ózindik qaýipsizdik basqarmasynyń bastyǵy Áset Karmenov.
Atalǵan derek QR QK 367-babynyń 1-bóligine (Memlekettik fýnktsııalardy oryndaýǵa ýákilettik berilgen adamǵa para berý) sáıkes sotqa deıingi tergeýdiń biryńǵaı tizilimine tirkeldi.
«Ustalǵan azamat Almaty qalasyna ótý áreketin dostarymmen kezdesip, serýendeý úshin dep túsindirgen. 5000 teńge kólemindegi aqshalaı qarajat tárkilenip, is júrgizý tártibimen is materıaldaryna qosyldy», - dep tolyqtyrdy Á. Karmenov.
