Aýyl turǵyny «Bars-pıkap» avtokóligin qurastyryp mindi - Qyzylorda oblysy
QYZYLORDA. QazAqparat - Bul kólik bir jaǵynan jeńil avtokólikke uqsaıdy. Alaıda, dóńgelegi baıaǵy júk tasıtyn GAZ-66-niki sekildi. Jańa avtokólikti qurastyryp shyǵarǵan Jańaqorǵan aýdany Qyrkeńse (burynǵy Zadarıa) keńsharynda prorab bolǵan Israıldyń uly Baıanbaı degen azamat. Bul týraly QazAqparat tilshisi aýdandyq ákimdikke silteme jasap habarlady.
Baıanbaı uzaq jyldar boıy qaýipsizdik salasynda qyzmet etip, zeınetke shyqqan. Ol jaramsyz dep tastalǵan mashına bólshekterin bir jarym jylǵa jýyq ýaqyt jınap, qoldan qurapty. Joq jerlerin qoldan jasap, dánekerlep, qosymsha bólshekter ornatatyn jerlerdi tesip-kesip ornatypty.
«Avtokólik quraý bala kezimnen armanym bolatyn. Alǵash oıynshyq qurastyrýdy balabaqshada júrip bastadym. Ol kezde qazirgideı oıynshyq kóp emes kez. Keıin mektepke barǵannan keıin orta synyptarda qoldan motorly qaıyq jasap, jas konstrýktorlar baıqaýyna qatysyp, júldeger atandym. Mektep bitirgenshe jas ónertapqyshtardyń baıqaýyna 7-8 ret (oblystyq, respýblıkalyq) qatysyp, jeńimpaz atanǵan kezderim de boldy. 11 synyp oqyp júrgenimde alǵashqy mototsıklimdi qurap, ony aýyl ishinde biraz ýaqyt aıdadym», - deıdi Baıanbaı.
Baıanbaı qaýipsizdik salasy boıynsha zeınetke shyqqannan keıin bala kúngi armandaryn júzege asyrýǵa kirisedi. 2013 jyly Astanaǵa jaqyn mańdaǵy bir áskerı bólimde merzimi bitip, joıylýǵa jiberý aldynda qarapaıym azamattarǵa satýǵa qoıylǵan avtokólikter ishinen motory joq bir GAZ-66 júk mashınasyn satyp alady. Avtokólikti ózge kólikterden ózgeshe etip jasamas buryn sýretshilermen, dızaınerlermen aqyldasyp, mashına jasaý zaýyttarynda arnaıy bolyp ınjener-konstrýktorlarmen keńesedi. Ondaǵy maqsat - jol talǵamaıtyn, jyldamdyǵy saǵatyna 100 shaqyrymnan kem bolmaıtyn, qajettiligine qaraı 7-8 jolaýshyny jáne 1-1,5 tonnaǵa deıin júk alyp júre alatyn ámbebap (ýnıversalnyı) jeńil avtokólik jasaý boldy.
Arnaıy mamandarmen aqyldasa kele kólik qurastyrýǵa 2014 jyly kirisedi. Іshine birneshe adam erkin sııý úshin dál osyndaı ekinshi kabına satyp alady. GAZ-53 avtokóliginiń motoryn korobkasymen GAZ-66 mashınasynyń qańqasyna ornatady. Eki kabınany biriktirip jolaýshylar salon jasaıdy. Artqy salonǵa úıindegi eki adamdyq dıvandy qoıady. «Muny isteýdegi maqsatym, uzaq jolǵa shyqqanda jolshybaı kez kelgen jerde toqtap jatyn-jaı izdemeı-aq, artqy salondy jazyp jiberip, demala beresiń», - deıdi ol.
Ol avtokólikti qurastyrýda ózge jandardyń kómegine súıenbeı, bárin asyqpaı túgel ózimniń qolymen shyǵarypty. Kabınanyń tóbesinen arnaıy lıýk jasaıdy. Bul bir jaǵy ishke aýa urýǵa, ekinshi jaǵynan ańǵa shyqqanda kabınadan túspeı-aq ań atýǵa múmkindik beredi. Kabınanyń artqy jaǵyna arnaıy sıymdylyǵy 1-1,5 tonna bolatyn júk salǵysh jasaıdy. Nátıjesinde syıymdylyǵy 7 adamdyq pıkap bolyp shyǵady. Bir qyzyǵy, avtokólikte memlekettik nómiri de bar eken. San ret synaqtan ótken. Kólikke barlyq «parametrler boıynsha tehnıkalyq jaǵynan jaramdy» dep qorytyndy shyǵarylǵan.
«Jaı qara jolda saǵatyna 60-70 shaqyrymdy, al, asfaltta 100-110 shaqyrymdy alady. Janar-jaǵarmaıdy da djıpterden kóp paıdalanbaıdy. 100 shaqyrymǵa 22-25 lıtr ǵana. Eń bastysy jol talǵamaıdy. 2016 jyldyń jazda avtokólikke avtorlyq kýálik pen sertıfıkat aldym. Al, osydan birneshe kún buryn memlekettik nómirge ıe boldym. Sodan keıin kólikke «Bars»-pıkap» degen ataý qoıdym, - deıdi ónertapqysh.
