Aýyl turǵyny 6 jasar qyzdy pedofıldyń shyrmaýynan qutqaryp aldy
TALDYQORǴAN. QazAqparat - Almaty oblysynda alty jasar qyz balaǵa shabýyldady degen kúdikti ustaldy, dep habarlaıdy QazAqparat tilshisi.
Polıtsııa Alakól aýdanyndaǵy aýyldardyń birinde balaǵa shabýyldap, zorlaýǵa umtyldy degen kúdikpen 25 jastaǵy er adamdy ustady.
Anyqtalǵandaı, er adam alty jasar qyzdy «dárilik shóp teremiz» dep aldap, aýyldan oqshaý jerge alyp shyqqan da, zorlamaq bolǵan. Abyroı bolǵanda, balanyń jan daýsyn jergilikti turǵyndardyń biri estip qalǵan. Sol zamatta oqıǵa ornyna júgirip jetip, balany pedofıldiń shyrmaýynan qutqaryp alady. Qaskóı ol jetkenshe balany sheshindirip úlgergen.
«53 jastaǵy aýyl turǵyny tez arada ýchaskelik polıtseıdi shaqyryp, ol kelgenshe kúdiktini ustap otyrǵan. Qyz aman-esen. Pedofıl aram oıyn iske asyryp úlgermegen. Qazir kúdikti qamaýǵa alynǵan, Alakól aýdandyq polıtsııasynyń ızolıatorynda otyr. Osy derek boıynsha sotqa deıingi tergep-tekserý bastaldy», - dep málimdedi Almaty oblystyq PD baspasóz qyzmeti.
Vedomstvo ókilderiniń aıtýynsha, polıtseıler balanyń taǵdyryna arasha túsken er azamatqa alǵys bildirmek.
Avtor: Hasan Espanov
