Aýyl turǵyndarynyń densaýlyǵyn zerttep-qaraý tizbesi keńeıdi

ASTANA. QazAqparat – Medıtsınalyq tekserýden ótken 11 myńnan astam aýyl turǵynynda joǵary qan qysymy, qant dıabeti, búırek patologııasynyń belgileri anyqtaldy. Bul týraly búgin Senattaǵy Úkimet saǵatynda Densaýlyq saqtaý mınıstri Ajar Ǵınııat aıtty, dep habarlaıdy QazAqparat tilshisi.

«Koronavırýstyq pandemııa jyldarynda elde júrgizilgen shekteý sharalaryna baılanysty aýyl men qala halqynyń arasynda medıtsınalyq kómek kórsetýde alshaqtyq anyqtaldy. Búginde aýyldarda halyqty erte dıagnostıkalaý jáne konsýltatsııalyq-dıagnostıkalyq qyzmetterdiń qoljetimsizdigi baıqalady. Osyǵan baılanysty, bıyl aýyl turǵyndary úshin profılaktıkalyq qarap-tekserýler engizildi», - dedi ol.

Mınıstrdiń atap ótýinshe, buryn skrınıngterde tek júrek-qan tamyrlary aýrýlary, glaýkoma, qant dıabeti, onkologııalyq aýrýlar, minez-qulyqtyq qaýip faktorlary sııaqty bes nozologııa anyqtalatyn. Al bıyl aýyl turǵyndary densaýlyǵynyń taldaýyn eskere otyryp, zerttep-qaraý tizbesi keńeıdi. Asqazan-ishek joldarynyń, nesep shyǵarý júıesiniń, egde jas tobyndaǵy adamdardyń tynys alý aǵzalarynyń aýrýlaryn jáne qýyq asty beziniń obyryn erte anyqtaý boıynsha profılaktıkalyq qarap-tekserýler iske asyrylyp jatyr.

«Týǵannan bastap 18 jasqa deıin - «Balalar», 18 jastan bastap 29 jasqa deıin - «Jastar», 30 jastan bastap 44 jasqa deıin - «Eńbek-1», 45 jastan bastap 65 jasqa deıin - «Eńbek-2» jáne 66 jastan asqandar «Zeınetker» sııaqty sanattar boıynsha nysanaly toptar anyqtaldy. Búgingi tańda zerttelgen 44 myń aýyl turǵynynyń 11 myńnan astamynan joǵary qan qysymy, qant dıabeti, búırek patologııasynyń belgileri anyqtaldy», - dedi Ajar Ǵınııat.