Aýyl turǵyndaryna shań jutqyzǵan Shetpedegi karerlerdi ekologtar tekserdi

AQTAÝ. QazAqparat - Mańǵystaý oblysynyń ekologııa departamenti Shetpe kentindegi karerlerge júrgizilgen tekserý nátıjesin jarııalady, dep habarlaıdy QazAqparat.

QR Bas prokýratýrasynyń bastamasymen Shetpe kentinde tekserý júrgizilgen. Nátıjesinde birqatar ekologııalyq zańbuzýshylyq anyqtaldy.

Bul jaıynda qoǵamdyq kommýnıkatsııa ortalyǵynda ótken brıfıngte ekologııa departamentiniń basshysy Rýslan Tókenov málim etti.

Spıkerdiń aıtýynsha, 10 mekemege tekseris júrgizilgen.

Atap aıtsaq, «Qazyna Mańǵystaý» JShS, «Shetpe-Tas» JShS, «Shetpe Tas LTD» JShS, «Temirtas-1» JShS, «Nura» JShS, «Muńal-M» JShS, «Baı beg» JShS, «MKDSM» AQ, «Azııa Tas 1000» JShS, «Aıan-Aqtaý» JShS tekserilgen.

Qazir «K.H.Seıdalıev A.Q.» JK monıtorıng júrip jatyr.

- Burǵylaý kezinde taý jynystarynyń jappaı jarylý shegi saqtalmaıdy (bul qorshaǵan ortaǵa diril-shý áserin tıgizip, aýyl turǵyndarynyń erekshe narazylyǵyn týǵyzady). Óndiristik ekologııalyq baqylaý esebi ýaqtyly tapsyrylmaǵan, jer qoınaýyn paıdalanýshylardyń taý-ken massasyn usaqtaý jumysy júrgiziletin jerdi ylǵaldandyrý úshin sýdy durys paıdalanbaýynan shań kóterilgen,-dedi Rýslan Tókenov.

Departament karerler men usaqtaý-eleý zaýyttaryna kireberiste óndirisaralyq asfalt joldaryn sý monshalarymen birge salýdy, jer qoınaýyn paıdalaný úshin karerlerdi jabý máselesin keńinen qarastyra otyryp (jaýapty memlekettik organdardyń shart talaptaryn saqtamaýy), jańa lıtsenzııa berýdi shekteýdi usyndy.

- Anyqtalǵan ekologııalyq zańbuzýshylyqtar prokýratýraǵa joldanǵan, búgingi tańda prokýrordyń aktisin kútip otyrmyz,-dedi Rýslan Tókenov.

Eske sala keteıik, buǵan deıin oblys ákimi Nurlan Noǵaev Shetpedegi karer ıeleriniń sanıtarlyq normalardy buzyp otyrǵanyn aıtqan bolatyn.

Mańǵystaý oblysynda eldi mekender mańyndaǵy karerlerdiń shańynan zardap shekken turǵyndar birneshe ret shaǵym túsirgen.

Karer ıelerine ekologııa departamenti birqatar talap qoıyp, nusqaý bergenimen, olar áli de oryndalmaǵan.

Mańǵystaý aýdany Shetpe aýylynyń mańynda 29 karer bar. Qazirgi tańda onyń 11-i istep tur.

Jergilikti turǵyndar karer ıeleriniń ekologııalyq talaptardy buzǵany jóninde birneshe ret shaǵymdanǵan. Másele óńirdegi jer qoınaýyn paıdalaný jáne karerlerdiń jumysyna arnalǵan otyrysta talqylandy.