Aýyl turǵyndaryna sapaly medıtsınalyq qyzmet kórsetý úshin 50 jyljymaly medıtsınalyq keshen satyp alynady
ASTANA. 21 jeltoqsan. QazAqparat - Aýyl turǵyndaryna qyzmet kórsetý úshin 50 jyljymaly medıtsınalyq keshen satyp alynady, dep habarlady Densaýlyq saqtaý mınıstrliginiń baspasóz qyzmetinen.
Elbasynyń tapsyrmasyna sáıkes alys aýyldardaǵy turǵyndardyń sapaly medıtsınalyq kómekke degen qoljetimdiligin arttyrý úshin respýblıka Úkimeti jalpy somasy 4,3 mıllıard teńgege 50 jyljymaly medıtsınalyq keshen satyp alý týraly sheshim qabyldady.
Kókshetaýdaǵy «Kamazınjınırıng» kásiporny shyǵaratyn KamAZ kóligine ornatylatyn jyljymaly medıtsınalyq keshender zamanaýı medıtsınalyq jabdyqtarmen jaraqtalyp, dárigerler brıgadalarymen jasaqtalady.
Medıtsınalyq keshender Elbasynyń 2010 jylǵy 29 qarashadaǵy №1113 Jarlyǵymen bekitilgen Qazaqstan Respýblıkasynyń densaýlyq saqtaý salasyn damytýdyń 2011-2015 jyldarǵa arnalǵan «Salamatty Qazaqstan» memlekettik baǵdarlamasynyń negizgi baǵyttaryn júzege asyrýǵa qoldaý bolady. Qolǵa alynyp otyrǵan sharalar 2,2 mıllıonnan astam aýyl turǵynyn medıtsınalyq baqylaýmen qamtýǵa múmkindik beredi, deıdi mamandar.
Mundaı keshender «Salamatty Qazaqstan» memlekettik baǵdarlamasynyń negizgi baǵyttaryn iske asyrýǵa múmkindik beredi. Atap aıtqanda, JMK dárigerleri jyl saıyn halyqtyń jalpy sanynyń jáne profılaktıkalyq tekserýlerdiń kem degende 30 paıyz bóligin qamtıtyn halyqtyń nysanaly toptaryna arnalǵan ulttyq skrınıngtik baǵdarlamalar keshenin ótkizedi. Bul aýrýlardy erte anyqtaýǵa, olardy ýaqtyly emdeýge, sondaı-aq asqynýlarǵa, múgedektikke jáne ólim-jitimge ákep soǵatyn aýrýlardyń aýyr belgilerin toqtatýǵa múmkindik beredi.
