Aýyl turǵyndaryna arnaıy medıtsınalyq kómektiń qoljetimdiligin qamtamasyz etý úshin telemedıtsına engizildi
ASTANA. QazAqparat - «Salamatty Qazaqstan» memlekettik baǵdarlamasy sheńberinde shalǵaı aýdandar men aýyldardyń turǵyndaryna medıtsınalyq kómektiń qoljetimdiligin qamtamasyz etý maqsatynda kólik medıtsınasyn damytý isi óz jalǵasyn tabýda, dep habarlaıdy QR Densaýlyq saqtaý mınıstrliginiń baspasóz qyzmetinen.
Sanıtarlyq avıatsııany paıdalaný arqyly jedel medıtsınalyq kómektiń qoljetimdiligin jáne sapasyn arttyrý maqsatynda 2011 jyly Qazaqstanda alǵashqy ret Respýblıkalyq sanıtarlyq avıatsııa ortalyǵy qurylǵan edi. 2013 jyly bolǵan 1355 ushyrylymda naýqastar óńirlerden ortalyqtarǵa tasymaldanyp, olarǵa 135 ota jasalǵan, 502 konsýltatıvtik, 1813 medıtsınalyq qyzmet kórsetildi.
Joldarda jaraqattanýdy jáne ólimdi azaıtý, ýaqytynda jedel medıtsınalyq kómek kórsetý úshin respýblıkalyq deńgeıdegi avtomobıl joldarynyń qaýipti ýchaskelerinde 26 trassalyq medıtsınalyq-qutqarý pýnkteri ashyldy.
2014 jylǵy 1 qańtardaǵy jaǵdaı boıynsha elimizde aýyl turǵyndaryna 179 ortalyq aýdandyq aýrýhana, 140 aýyldyq aýrýhana, 1495 dárigerlik ambýlatorııa, 4454 feldsherlik-akýsherlik pýnktter, feldsherlik pýnktter jáne medıtsınalyq pýnkter qyzmet kórsetýde.
Sozylmaly aýrý túrlerine shaldyqqan naýqastarǵa patronaj jasaý, naýqastar úıge shaqyrǵanda kómektesý úshin ýchaskelik dáriger, pedıatr, ekinshi meıirger laýazymdaryn engizý arqyly medıtsınalyq-sanıtarııalyq alǵashqy kómekti uıymdastyrý úlgisin jetildirý jumystary jalǵastyrylýda. Sondaı-aq, profılaktıkalyq jumys (skrınıngter, maqsatty toptardy qalyptastyrý, salaýatty ómir saltyna jáne profılaktıkaǵa úıretý) júrgizý úshin úshinshi meıirger de turǵyndarǵa qyzmet kórsetedi.
Sonymen qatar, aýyl turǵyndaryna arnaıy medıtsınalyq kómektiń qoljetimdiligin qamtamasyz etý úshin 14 oblysta, Astana jáne Almaty qalalarynda telemedıtsına engizildi. 2013 jyly 17752 astam telemedıtsınalyq keńes jáne shalǵaı aýyldardaǵy turǵyndar úshin 4258 beınekonferentsııalyq baılanys seanstary ótkizildi.
2013 jyly jyljymaly medıtsınalyq keshender arqyly 871 myńnan astam aýyl turǵyndary, onyń ishinde 211 myńnan astam balalar medıtsınalyq tekserýden ótkizildi, 1,1 mln. laboratorııalyq-dıagnostıkalyq zertteýler jasalyp, 795 myńdaı beıinde mamandardyń keńesteri uıymdastyryldy. «Densaýlyq», «Járdem», «Salamatty Qazaqstan» konsýltatıvtik-dıagnostıkalyq poıyzdarynyń dárigerler brıgadasy 301 stansanyń 65 myńdaı turǵynyn tekserýden ótkizgen.
