Aýyl turǵyndaryn sapaly aýyzsýmen qamtamasyz etý jospary daıyndaldy
NUR-SULTAN. QazAqparat - Turǵyndarynyń sany 200 adamnan az shaǵyn aýyldardy sanıtarlyq normalarǵa sáıkes keletin aýyzsýmen qamtamasyz etý maqsatynda sý tazartatyn keshendi blok-modýlder ornatylady. Bul týraly búgin Úkimet otyrysynda QR Indýstrııa jáne ınfraqurylymdyq damý mınıstri Roman Sklıar aıtty, dep habarlaıdy QazAqparat tilshisi.
«El boıynsha 18,4 mln adamnyń 90,2 paıyzy nemese 16,5 mln adam ortalyqtandyrylǵan sýmen jabdyqtalǵan. 2018 jyldyń qorytyndysy boıynsha qalalarda 10 mln adam ortalyqtandyrylǵan sýmen qamtylǵan. Bul qala halqynyń 94,5 paıyzyn quraıdy. Qalǵan halyq sý taratatyn kolonkalardy paıdalanýda. Qalalardaǵy ómir sapasyn arttyrý úshin aǵymdaǵy jyly osy kórsetkishti 97 paıyzǵa deıin, al 2023 jyly 100 paıyzǵa deıin arttyrý josparlanǵan»,- dedi ol.
Mınıstrdiń dereginshe, aýyldarda ortalyq sýmen 6,5 mln adam nemese 84,4 paıyzy qamtylǵan. Bul rette, basqa aýyldar jergilikti sý kózderin paıdalanady. Osy rette mınıstrlik 2019 jyly bul kórsetkishti 88 paıyzǵa deıin jetkizýdi jáne 2023 jyly halyqtyń 100 paıyzyn tıisti ınfraqurylymmen qamtamasyz etýdi josparlap otyr.
«Búgingi kúni biz aýyldardy sapaly jáne qajetti kólemde sýmen jabdyqtaý qyzmetimen qamtamasyz etý josparyn daıyndadyq. Halqynyń sany 200 adamnan az shaǵyn aýyldardy sanıtarlyq normalarǵa sáıkes keletin aýyzsýmen qamtamasyz etý maqsatynda sýdy tazartatyn keshendi blok-modýlder ornatý qajet. Bul 1333 aýyldy sýmen qamtýǵa múmkindik beredi. Turǵyndary 200 adamnan kóp 1274 aýyl ortalyq sý qubyrlarymen qamtylatyn bolady. Osylaısha 2607 aýylda turatyn 1,2 mln adam sanıtarlyq normalarǵa sáıkes keletin sýmen jabdyqtaý qyzmetimen qamtamasyz etiledi»,- dedi Roman Sklıar.
