Aýyl turǵyndary úshin sanıtarlyq avıatsııanyń mańyzdylyǵy zor

Búgin Májilistiń jalpy otyrysynda depýtat Tıto Syzdyqov QR Premer-Mınıstri Kárim Másimovtiń atyna saýal joldap, sanıtarlyq avıatsııa týraly máselege nazar aýdarýyn ótindi, dep habarlaıdy QazAqparat.

Atalǵan qyzmet túri Keńes Odaǵy kezinde aýyl turǵyndaryna óte qajetti jáne memleket tarapynan qomaqty kómek kórsetiletin salanyń biri bolǵany anyq. Biraq 1990 jyldardan bastap sanıtarlyq avıatsııany qarjylandyrý jetkiliksiz bolǵandyqtan, bul medıtsınalyq kómek elimizdiń óńirleriniń, ásirese, shettegi aýyl turǵyndarynyń qoly jetpeıtin sala boldy. Degenmen qazir elimizde oń qadamdar jasalýda. Ótken jyly «Halyq densaýlyǵy jáne densaýlyq saqtaý júıesi týraly» Qazaqstan Respýblıkasynyń kodeksi qabyldandy. Onyń 50-shi babyna sáıkes sanıtarlyq avıatsııa - shuǵyl medıtsınalyq kómek usyný nysany bolyp bekitildi.

Depýtat óz sózinde «Halyq densaýlyǵy jáne densaýlyq saqtaý júıesi týraly» Qazaqstan Respýblıkasynyń kodeksine sáıkes Qazaqstan Respýblıkasy Úkimettiń 2009 jylǵy 15 jeltoqsandaǵy №2136 qaýlysymen sanıtarlyq avıatsııa tegin medıtsınalyq kómektiń kepildik berilgen kóleminiń tizbesine engizilgenin aıtyp ótti.

Sonymen zańdar qabyldanyp, soǵan oraı zańnamalyq aktiler men qaýlylar shyǵaryldy. Al turǵyndarymyz bolsa: «Respýblıkada sanıtarlyq avıatsııa qaıtadan jańaratyn kez qashan keledi?» dep kúte-kúte shydamdary taýsylatyn boldy.

«Ústimizdegi jyly Almaty men Shyǵys Qazaqstan oblystarynda oryn alǵan apattar mundaı jaǵdaıda tikushaqtardyń óte qajet ekenin aıqyndap berdi. Qansha adamnyń ómiri tikushaqtyń arqasynda aman qaldy! Sol sekildi jaı kúnderde de aýyl turǵyndary qatty syrqatqa tap bolǵan jaǵdaıda ony aýrýhanaǵa jetkizýdiń qıyndyǵy óte kóp. Qala turǵyndaryna jedel medıtsınalyq kómekti kórsetkende sheteldik avtokólikti jiberedi, al aýyldarda tek qana eski «ÝAZ» mashınalary júredi. Áıelder júktilik kezeńinde ondaı mashınamen aýrýhanaǵa qalaı jetedi dep oılaısyz? Menińshe, memleketimiz Konstıtýtsııa boıynsha barlyq azamattarymyzdy birdeı qorǵap, qamqorlyqqa ala bilýi kerek. Sebebi bizdiń adamdarymyzdyń sany sonsha kóp emes qoı - biz úshin árbir adamnyń ómiri qymbat!»,- dedi T.Syzdyqov.

Atalǵan másele boıynsha depýtat Úkimet basshysynan «Qazirgi kezde sanıtarlyq avıatsııa týraly zańnama qalaı oryndalyp jatyr, ol úshin memleket tarapynan qansha qarajat bólingen?» jáne «Zań boıynsha qaı oblystarda jáne qashan sanıtarlyq avıatsııalardyń jumysy bastalady?» degen suraqtarǵa jaýap berýin ótindi.