Aýyl turǵyndary úshin chek-ap paketteri engizilýde – mınıstr

NUR-SULTAN. QazAqparat – Aýyl turǵyndary úshin profılaktıkalyq tekserýler engiziledi. Bul týraly QR Densaýlyq saqtaý mınıstrliginiń keńeıtilgen alqa otyrysynda vedomstvo basshysy Ajar Ǵınııat málim etti, dep habarlaıdy QazAqparat.

Mınıstrdiń aıtýynsha, chek-ap paketteri úsh negizgi jas toby: 18-29 jas, 30-44 jas, 45-65 jas boıynsha engiziledi. Qazirgi ýaqytta qajetti dıagnostıkalyq qyzmetterdiń kólemi jáne olarǵa qajetti qarjyny esepteý júrgizilip jatyr.

«Búginde qala men aýyl turǵyndary arasynda profılaktıkalyq tekserýlerdiń qol jetimdiliginde dısbalans oryn alǵany barshaǵa málim. Osyǵan baılanysty aǵymdaǵy jyly aýyl turǵyndary úshin profılaktıkalyq tekserý paketterin, onyń ishinde birinshi kezeńde aýyldyq medıtsınalyq pýnkter bazasynda engizý josparlanýda», - dep atap ótti Ajar Ǵınııat.

Sonymen qatar QR Densaýlyq saqtaý mınıstrligi balalar kontıngenti aýrýlarynyń aldyn alýǵa kúsh salýdy josparlap otyr.

«Balalardyń densaýlyǵyn qorǵaý jónindegi is-sharalardy iske asyrý sheńberinde mınıstrlik aldyn alýǵa erekshe nazar aýdaratyn bolady. Óıtkeni eresek halyqtyń densaýlyǵynyń negizderi men bolashaq aýrýlarynyń alǵysharttary dál balalyq shaqta qalanady. Osyǵan baılanysty júrgizilip jatqan zertteýlerdiń aǵymdaǵy kólemin eskere otyryp, balalardy profılaktıkalyq tekserý paketteri keńeıtiletin bolady», - dep habarlady Densaýlyq saqtaý mınıstrliginiń basshysy.

Qazirgi ýaqytta paketterdi túpkilikti qalyptastyrý, normatıvtik-quqyqtyq aktilerge ózgerister engizý jáne profılaktıkalyq tekserýlerdi qarjylandyrý boıynsha jumystar júrgizilýde.

Budan basqa, mektep medıtsınasyn jetildirý sheńberinde jańa standart engiziletin bolady. Bul oqýshylardy kásiptik qaraý tásilderin júıeleýge jáne AІJ, tirek-qımyl apparaty, kórý jáne t. b. aýrýlardy erte anyqtaýdy kúsheıtýge múmkindik beredi.