Aýyl turǵyndary «Qazposhta» arqyly dári-dármekke tapsyrys berip, temir jol bıletterin ala alady
ASTANA. QazAqparat - Aýyl turǵyndary «Qazposhta» arqyly dári-dármekke tapsyrys berip, temir jol bıletterin satyp alady. Bul týraly búgin «Qazposhta» AQ basqarmasynyń tóraǵasy Baǵdat Mýsın málim etti.
«Biz aýyldyq jerlerge tapsyrys boıynsha dári-dármek jetkizý qyzmetin qolǵa aldyq. Pavlodar oblysynda 200-ge jýyq aýyl turǵynyna tapsyrys arqyly dári-dármek jetkizip berdik. Endi jobany elimizdiń búkil óńirine taratý oıymyzda bar. Aǵymdaǵy jyly bul ilki joba retinde júzege asyrylǵan bolatyn, al kelesi jyly barlyq óńirlerge taratýdy josparlaýdamyz», - dedi ol.
Sonymen qatar, ol elimizdiń shalǵaı óńirlerinde ornalasqan aýyldarǵa «Qazposhta» arqyly birqatar qyzmetter ilki joba retinde qolǵa alynǵanyn atap ótti. Máselen, onyń sózine qaraǵanda, aldaǵy ýaqytta aýyl turǵyndary ekinshi deńgeıli bankter usynatyn kóptegen qyzmet túrlerin «Qazposhta» arqyly ala alatyn bolady.
«Taǵy bir jobamyz, búgingi kúni bizdiń aýyldyq jerlerdegi bólimshelerimizde temir jol bıletteri satyla bastady. Ózderińizge de belgili, barlyq aýylda birdeı temir jol bıletterin satý múmkindigi bolǵan joq. Endigi ýaqytta biz osy múmkinshilikti usynamyz», - dedi B.Mýsın.
