Aýyl turǵyndary gaz qubyrynyń sapasyz tartylǵanyna narazy - Almaty oblysy
Atalǵan eldi mekenniń turǵynynyń biri atqarylyp jatqan jumysty vıdeoǵa túsirip, jelige júktegen.
«Qarańyzdar, bizde gaz qubyry qalaı bolsa solaı tartylyp jatyr»,- deıdi beınejazba avtory.
Al Eskeldi aýdany ákimdigi QazAqparat tilshisiniń resmı saýalyna bylaı dep jaýap berdi. Mamandardyń sózinshe, qubyrlardy júk kóligi zaqymdap ketken. Jumystar aldaǵy ýaqytta qaıta qalpyna keltiriledi.
«Eskeldi aýdanyna qarasty Qarabulaq aýyldyq okrýgine «MBK Qurylys» JShS-nyń merdigerlik etýimen gaz tartylýda. Jaqynda áleýmettik jelilerge Qarabulaq aýyldyq okrýginiń Áýezov atyndaǵy kóshesine gaz qubyrlarynyń sapasyz tartylǵandyǵy jaıly vıdeo taraǵan bolatyn. Vıdeoda gaz qubyry jerde qulap jatqandyǵy kórsetilgen. «Áýezov kóshesinde gazben qatar jylý júıesi de tartylýda. Osy kóshe tym tar bolǵandyqtan jylý júıesin júrgizip jatqan «Sapa qurylys 2007» JShS-nyń traktory kóshege syımaı, gaz qubyrlaryna zaqym keltirgen. Osyǵan baılanysty jylý júıesin ornatqan merdigerler gaz tartyp jatqan kompanııamen kelisimshartqa otyrdy. Jumystar aıaqtalǵannan keıin zaqymdanǵan gaz qubyrlary ornyna keltiriletin bolady», - delingen atalǵan vedomstvonyń baspasóz qyzmetiniń resmı habarlamasynda.
