Aýyl turǵyndary birneshe ese únemdi «jasyl» peshterdi ornata alady
ASTANA. QazAqparat - Aýyl turǵyndary kómirdi únemdi paıdalanatyn "jasyl" peshterdi satyp alýǵa qaýqarly. Bul týraly Ortalyq kommýnıkatsııalar qyzmetinde «Jasyl» ekonomıkany jáne G-Global damýyn qoldaýshy koalıtsııa» ZTB atqarýshy dırektory Ashat Súleımenov málim etti
"Qarapaıym halyqqa qoljetimdi "jasyl" tehnologııalardy qalaı paıdalanýdyń joldary bar. Atap aıtqanda, aýyldyq jerlerde ortalyqtandyrylǵan jylý júıeleri tartylmaǵan úılerge pırolızdik peshterdi qoldanýǵa bolady. Pırolızdik peshter halyq úshin de, ekologııa úshin de óte tıimdi, paıdaly. Bir salym kómirmen jylýdy tórt-bes kúnge jetkizýge bolady", - dep atap ótti ol.
Onyń aıtýynsha, bunyń qazirgi peshterden aıyrmashylyǵy - energotıimdi bolýynda. Odan shyǵatyn qaldyq óte az. Óıtkeni ol kómirqyshqyl gazdy qaıta óńdep, jaǵyp shyǵarady. Sol sebepti aýany da lastamaıdy.
Qazirgi ýaqytta mundaı perolızdik peshter Qaraǵandy oblysynda Shahtınsk jáne Temirtaý qalalarynda jasalady. Baǵasy da qoljetimdi.
"Biz mundaı peshti mektepterdiń birine ornattyq. Ondaǵy únemniń kólemi jylyna 400 myń teńgege jetken. Men ol peshterdi jasaıtyn adamdarmen sóılestim, "eger úıimiz 200 sharshy metr bolsa, peshtiń quny qansha bolady" dep suradym. 1200 sharshy metrlik mektepti jabdyqtaýǵa 1 mln. teńge ketken bolsa, qarapaıym bir otbasylyq úıge peshtiń quny shamamen 200 myń teńge bolady. Menińshe bul qatty qymbat tehnologııa emes", - deıdi A. Súleımenov.
