AUYL SPORT – 2026: Atyraý men Almaty oblysynyń jas sportshylary kósh bastady

3-7 qarasha aralyǵynda ótken respýblıkalyq týrnır bıyl úshinshi ret uıymdastyryldy. Aýyl balalary boks, erkin kúres, karate, basketbol, voleıbol, shahmat, ústel tennısi jáne shaǵyn fýtboldan ózara myqtyny anyqtady.

Jyl saıyn aýqymy keńeıip kele jatqan jobaǵa bıyl elimizdiń 17 óńirindegi 400-den astam aýyldan 12 myń bala tartyldy. Solardyń arasynan iriktelgen 1700 jas sportshy elordada ótken respýblıkalyq fınalǵa joldama aldy. Jobanyń alǵashqy maýsymynda fınalǵa 1300 bala qatysqan bolatyn.

Bıyl jarys baǵdarlamasyna alǵash ret shaǵyn fýtbol engizildi. Al byltyr ústel tennısi qosylǵan edi. Osylaısha aýyl balalarynyń sporttyń ártúrli túrinen qabiletin kórsetýine múmkindik keńeıip keledi.

Bes kúnge sozylǵan jarystyń qorytyndysynda 30 altyn, 30 kúmis jáne 47 qola medal tabystaldy.

Altyn júlde sany boıynsha Atyraý jáne Almaty oblystarynyń sportshylary úzdik shyqty. Eki óńirdiń órenderi de bes-besten altyn medal ıelendi. Atyraý oblysynyń qorjynynda bes altynmen qatar úsh kúmis jáne úsh qola medal bar. Al Almaty oblysynyń sportshylary bes altyn, eki kúmis jáne segiz qola júldege qol jetkizdi.

Mańǵystaý oblysy da joǵary nátıje kórsetti. Óńir sportshylary tórt altyn, úsh kúmis jáne úsh qola medal jeńip aldy.

Jambyl oblysynyń ókilderi úsh altyn, úsh kúmis, bir qola júlde ıelense, Aqmola oblysynyń sportshylary úsh márte jeńis tuǵyrynyń eń bıik satysyna kóterildi.

Jalpy júlde sany jaǵynan Túrkistan oblysy alǵa shyqty. Óńirdiń jas sportshylary eki altyn, jeti kúmis jáne jeti qola medal alyp, barlyǵy 16 júlde enshiledi.

Bıyl respýblıkalyq fınaldyń júlde qoryna 15,5 mıllıon teńgeden astam qarjy bólindi.

Týrnırdi uıymdastyrýdaǵy mańyzdy ereksheliktiń biri – qatysýshylardyń jol júrý, turý jáne tamaqtaný shyǵyndaryn Halyk qaıyrymdylyq qory tolyq óteýi.

Bul ásirese shalǵaı eldi mekenderden kelgen balalar úshin mańyzdy. Óıtkeni respýblıkalyq jarysqa qatysý múmkindigi otbasynyń qarjylyq jaǵdaıyna emes, jas sportshynyń daıyndyǵy men qabiletine baılanysty bolýy tıis.

Týrnırdiń ashylý saltanatynda Halyk Bank Basqarma tóraǵasynyń orynbasary Narıman Muqyshev osy máselege erekshe toqtaldy.

– Balanyń talanty men jeńiske degen umtylysy onyń qaı jerde týyp-óskenine baılanysty emes. Ár aýylda, ár eldi mekende úlken sportty armandaıtyn balalar bar. Bizdiń mindetimiz – olardyń sol armanǵa jetýine múmkindik jasaý. Búgingi qatysýshylardyń árqaısysy aılar boıy jattyǵyp, respýblıkalyq jarysqa joldama aldy. Munyń ózi – úlken jetistik. Óıtkeni balalar sportyna salynǵan ınvestıtsııa – eldiń densaýlyǵyna, bolashaǵyna salynǵan ınvestıtsııa, – dedi Narıman Muqyshev.

Jarysqa Sport jáne Oqý-aǵartý mınıstrlikteriniń vıtse-mınıstrleri, qoǵam qaıratkerleri men tanymal sportshylar da qatysty.

Olımpıada júldegeri Qamshybek Qońqabaev jas órendermen kezdesip, olarǵa jiger berdi.

AUYL SPORT jobasynyń úsh maýsymy aýyl balalarynyń respýblıkalyq deńgeıde óner kórsetýine múmkindik beretin aýqymdy sporttyq bastamaǵa aınaldy.

Alǵashqy maýsymnan beri aqtyq synǵa qatysýshylar sanynyń 1300-den 1700-ge deıin ósýi, sport túrleriniń kóbeıýi jáne irikteý kezeńine 12 myń balanyń qatysýy aýyldaǵy sportqa qyzyǵýshylyqtyń joǵary ekenin kórsetti.

Bıylǵy týrnır aıaqtalǵanymen, jas sportshylardyń aldaǵy jarystarǵa daıyndyǵy jalǵasa beredi. Respýblıkalyq dodada shyńdalǵan órender endi halyqaralyq deńgeıdegi básekelerde el namysyn qorǵaýdy maqsat etip otyr.

AUYL SPORT – 2026 týrnıriniń basty nátıjesi de osy: aýyl balalarynyń talantyn tanytyp, olarǵa úlken sportqa qadam basýǵa múmkindik berý.