Aýyl sharýashylyǵynyń jalpy ishki ónimi sońǵy 8 jyldaǵy eń joǵary kórsetkishke jetip, 11 paıyzdy quraıtyny boljanady - A. Kúrishbaev
A. Jeltoqsannyń 14-i. QazAqparat /Qanat Mámetqazyuly/ - Bıylǵy jyly aýyl sharýashylyǵy óndirisiniń jalpy ishki ónimdegi kórsetkishi 11 paıyzǵa deıin artatyny boljanady. Bul sońǵy 8 jyl ishindegi eń joǵary kórsetkish. Búgin Úkimet basshysy Kárim Másimovtiń qatysýymen ótip jatqan agroónerkásip kesheni respýblıkalyq keńesinde Aýyl sharýashylyq mınıstri Aqylbek Kúrishbaev osylaı málim etti,
dep habarlaıdy QazAqparat.
«Aıaqtalǵaly otyrǵan jyl ekonomıkanyń agrarlyq sektory úshin ońaı bolǵan joq. Degenmen, aýa raıynyń qolaısyzdyǵyna jáne qarjylyq daǵdarystyń áserine qaramastan, salada damý qarqyny bastaldy. Máselen, egin sharýashylyǵy jyldy tabysty aıaqtap otyr. Barlyq daqyldar túri boıynsha derlik óndiris kólemi artty. Ósimdik maıy daqyldaryn óndirý 700 myń tonna shamasyn qurady, bul rekordtyq kórsetkish. Bul alǵash ret ósimdik maıyna suranystaǵy normany elimizdiń ózin-ózi qamtamasyz etý deńgeıine jetkenin bildiredi», dedi A. Kúrishbaev.
Mınıstrdiń aıtýynsha, byltyrǵy jylmen salystyrǵanda kúrish, kartop jáne jemis-jıdekter mólsheri 20-25 paıyzǵa artqan bolsa, mal sharýashylyǵy úshin jem daıyndaý byltyrǵydan 20 paıyzǵa ósken. «Mal sharýashylyǵy salasy da turaqty damý qarqynyn saqtady. Bul sala boıynsha da mal basy ósimi saqtalyp, salanyń ónim óndirý aýqymy 4-6 paıyzǵa jetti», dedi A. Kúrishbaev.
