Aýyl sharýashylyǵyndaǵy ylǵal qoryn saqtaý tehnologııalaryn paıdalanǵandarǵa belgilengen joǵary sýbsıdııa tıimdiligin kórsetti - A.Kúrishbaev
ASTANA. Aqpannyń 3-i. QazAqparat /Aıdar Ospanalıev/ - Aýyl sharýashylyǵy mınıstrligi ylǵal qoryn saqtaý tehnologııalaryn paıdalanǵandar úshin joǵarylatylǵan sýbsıdııa bólý jónindegi normatıvter belgiledi. Bul týraly búgin Parlament Senatynda ótken Úkimet saǵatynda Aýyl sharýashylyǵy mınıstri Aqylbek Kúrishbaev málim etti,
dep habarlaıdy QazAqparat.
Onyń sózine qaraǵanda, mundaı ádis tek ótken jyldyń ózinde ǵana atalmysh tehnologııalardy qoldaný alqaptaryn 35 paıyzǵa ulǵaıtyp, egistik alqaptarynyń shamamen 60 paıyzyn qamtýǵa múmkindik bergen. «Sýbsıdııalaý normatıvterin teńdestirý sýarmaly egin sharýashylyǵyna qatysty da jasaldy», dedi mınıstr.
Onyń aıtýynsha, mınıstrlik buryn sýbsıdııalardy negizinen óndiristi qoldaýǵa baǵyttap, normatıvterdi «tepe-teńdik» qaǵıdaty negizinde júzege asyryp kelgen bolsa, 2008 jyldan bastap bul tájirıbeden bas tartyp, normatıvterdi saralaý jáne sýbsıdııa alýshylarǵa qosymsha talaptar qoıý arqyly olardy yntalandyryp otyr.
