Aýyl sharýashylyǵyndaǵy sýbsıdııalar sany 51-den 7-ge deıin qysqartylady - Úkimet

NUR-SULTAN. QazAqparat – Memleket aýyl sharýashylyǵyn sýbsıdııalaýda tehnıkalyq jáne tehnologııalyq jańarýǵa baǵyttalǵan ınvestıtsııalyq sýbsıdııalarǵa basymdyq beredi. Bul týraly QR Premer-Mınıstri Álıhan Smaıylov Májilis depýtattarynyń saýalyna joldaǵan jaýabynda jazdy, dep habarlaıdy QazAqparat tilshisi.

«Agroónerkásip keshenin memlekettik qoldaýdy jetildirý jónindegi jumys toby quryldy. Oǵan salalyq qaýymdastyqtar men odaqtardyń, agrobıznestiń, ǵylymnyń, múddeli memlekettik jáne jergilikti atqarýshy organdardyń, Parlament Senaty men Májilis depýtattarynyń ókilderi kirdi. Jumys toby otyrystarynyń sheńberinde sýbsıdııalaý rásimin ońaılatýdy, onyń baǵyttaryn ońtaılandyrýdy (sýbsıdııalar túrleriniń sanyn 51-den 7-ge deıin qysqartý josparlanyp otyr), barlyq sýbektiler úshin qoljetimdilikti qamtamasyz etýdi, zamanaýı tehnologııalardy engizýdi yntalandyrýdy jáne agroónerkásip keshenine ınvestıtsııalar tartýdy, naqty ındıkatıvtik kórsetkishterge qol jetkizý boıynsha fermerlerdiń qarymta mindettemeler alý normasyn engizýdi kózdeıtin jańa tásilder tanystyryldy», - delingen Úkimet basshysynyń jaýabynda .

Premer-Mınıstrdiń málimeti boıynsha, sýbsıdııalaýdyń jańa júıesine kóptegen usynystar túsken.

«Sýbsıdııalaýdyń basym baǵyttary retinde salany tehnıkalyq jáne tehnologııalyq qaıta jaraqtandyrýǵa, qarjy quraldary boıynsha mólsherlemelerdi sýbsıdııalaýǵa, sondaı-aq selektsııalyq-asyl tuqymdy, tuqym sharýashylyǵyn, shıkizatty tereń qaıta óńdeýdi sýbsıdııalaýǵa baǵdarlanǵan ınvestıtsııalyq sýbsıdııalaýdy aıqyndaý usynylady.

Bul ózgeristerdi bıyl iske asyrý josparlanǵan bolatyn. Sonymen qatar, aǵymdaǵy ahýaldy jáne onyń damý úrdisin keshendi taldaýdy, geosaıası daǵdarystyń el ekonomıkasyna teris áserin azaıtý boıynsha ońtaıly sharalar qabyldaý qajettiligin negizge ala otyryp, sýbsıdııalaýdyń jańa tetigin engizý máselesin kelesi jylǵa qaldyryp, bıyl memlekettik qoldaýdy qoldanystaǵy qaǵıdalar boıynsha júzege asyrý týraly sheshim qabyldandy», - dedi Álıhan Smaıylov.

Eske salsaq, QR Aýyl sharýashylyǵy mınıstri Erbol Qarashókeev álemdegi kúrdeli jaǵdaıǵa baılanysty Qazaqstandaǵy sýbsıdııa reformasy kelesi jylǵa shegerilgenin málim etken edi.