Aýyl sharýashylyǵyndaǵy saqtandyrý tásilderi ózgeredi
NUR-SULTAN. QazAqparat - QR Parlamenti Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine agroónerkásiptik keshendi retteý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaıdy QazAqparat tilshisi.
«Qarjylandyrýdyń qoljetimdigin arttyrý úshin zań jobasy aıasynda qoldanystaǵy qarjy tetikterin jetildirý jáne jańalaryn engizý kózdelgen. Qoldanystaǵy mindetti saqtandyrý júıesi 15 jyl buryn arnaıy zańmen engizilgen, sondaı-aq ósimdik sharýashylyǵyndaǵy saqtandyrýdy nasıhattaýǵa septigin tıgizýi tıis bolatyn. Alaıda bul mindet oryndalmady, saqtandyrylǵan egister úlesi jyl saıyn tómendeýde. Saqtandyrý formalary formaldy túrde qalyp otyr. Sharýalardyń alatyn saqtandyrý tólemderi eń az óndiristik shyǵyndy da jappaıdy. Osyǵan baılanysty zań jobasy aıasynda aýyl sharýashylyǵyndaǵy saqtandyrý júıeleriniń tásilderi ózgerdi», - dedi Aýyl sharýashylyǵy mınıstri Saparhan Omarov.
Bul rette mindetti saqtandyrýdan erikti saqtandyrýǵa, saqtandyrý tólemderin sýbsıdııalaýdan saqtandyrý syıaqylaryn sýbsıdııalaýǵa kóshý júzege asyrylady.
«Saqtandyrý tólemderin sýbsıdııalaýdan saqtandyrý syıaqylaryn sýbsıdııalaýǵa kóshý - agroónerkásiptik keshen sýbektileri úshin saqtandyrýǵa qoljetimdilikti arttyrady. Óıtkeni saqtandyrý polısi ekinshi deıgeıdegi bankterden qaryz alýǵanda qosymsha kepildik bola alady», - dedi mınıstr.
Budan bólek S. Omarov nesıelik seriktestikterdiń qyzmetin jaqsartý maqsatynda nesıelik seriktestik quramyna kirý jáne shyǵý tártibi jeńildetiletinin atap ótti. Eger buryn bul úshin nesıelik seriktestik qatysýshylarynyń jalpy jınalysynyń sheshimi talap etilse, al qazir seriktestikke qatysýshylardy qabyldaý men shyǵarý, sondaı-aq onyń jarǵysyn ózgertý jónindegi quzyret seriktestik basqarmasyna berildi.
Onyń atap ótýinshe, veterınarııa qyzmetiniń jumys isteý tıimdiligin arttyrý úshin zań jobasynda tıisti qadamdar kózdelgen.
Birinshiden, jergilikti atqarýshy organdardan jáne keden organdarynan (avtokólikte baqylaý) baqylaý-qadaǵalaý fýnktsııasyn veterınarııa salasyndaǵy ýákiletti organ vedomstvosyna qaıtarý jolymen barlyq baqylaý-qadaǵalaý fýnktsııasyn bir organǵa shoǵyrlandyrý eskerilgen.
Ekinshiden, jergilikti atqarýshy organdardyń veterınarııalyq qyzmetiniń vertıkaldy baǵynystylyǵyn qurý jolymen olardyń qurylymyn ózgertý, ıaǵnı veterınarııalyq bólimshelerdi aýdandar, oblystyq mańyzy bar qalalar deńgeıinde ókilderi bolý múmkindigimen oblys deńgeıinde shoǵyrlandyrý, sondaı-aq memlekettik veterınarlyq uıymdardy oblystyq deńgeıge baǵynysty etý qarastyrylǵan.
«Jergilikti atqarýshy organdarda veterınarııa salasyndaǵy iske asyrý fýnktsııasy qalady, ýákiletti organ vedomstvosyna barlyq kezeńdegi baqylaý-qadaǵalaý fýnktsııasy beriledi», - dedi Saparhan Omarov.
