Aýyl sharýashylyǵyndaǵy kásipker basshylardyń 31 paıyzy - áıelder
NUR-SULTAN. QazAqparat – Qazaqstandaǵy aýyl sharýashylyǵynyń ónimin óndirýshi jeke kásipker basshylardyń 31,3% - áıelder. Finprom.kz resýrsy osy salaǵa mamandanǵan zańdy tulǵalardyń qurylymyna taldaý jasady, dep habarlaıdy QazAqparat tilshisi.
Finprom.kz aýyl sharýashylyǵynda naqty jumys istep júrgen zańdy tulǵalardyń sany maýsym aıynyń aıaǵynda 17 myń qurylymmen tolyqqanyn jazady.
Bul byltyrǵy kezeńmen salystyrǵanda 6,7% kóp degen sóz.
Alaıda jumys istep turǵan sharýa qojalyqtary men fermerlik sharýashylyqtardyń sany 1% ǵana ósip, 221,8 myńǵa jetip otyr.
«Jeke kásipkerlik salasyndaǵy aýyl sharýashylyǵynyń ónimin óndirýshi uıymdardyń áıel basshylarynyń úlesi 31,3% bolyp otyr.
Bul kórsetkish sharýa qojalyqtary men fermerlik sharýashylyqtarda – 25,8%, zańdy tulǵalarda –17,2%.
Óńirler bólinisin alyp qarasaq, maýsym aıynyń qorytyndysy boıynsha agroónerkásip kesheninde jumys istep turǵan zańdy tulǵalardyń jartysynan astamy 20 aımaqtyń beseýinde ǵana shoǵyrlanǵan: Túrkistan (3,6 myń), Aqmola (1,9 myń), Soltústik Qazaqstan (1,4 myń), Almaty (1,2 myń) jáne Qostanaı (936) oblastary»,- dep jazady Finprom.kz.
Aıta ketsek, QR Aýyl sharýashylyǵy mınıstri Erbol Qarashókeevtiń aıtýyna qaraǵanda, bıyl forvardtyq satyp alý baǵdarlamasy aıasynda Azyq-túlik kelisim-shart korporatsııasyna bólingen 100 mlrd teńgeniń 80 paıyzy ıgerilgen.
