Aýyl sharýashylyǵynda shıkizat eksporty artýy múmkin - depýtat
Depýtattyń aıtýynsha, aýyl sharýashylyǵy taýaryn óndirýshiler elimizdiń ishinde óńdeý salasyn damytýǵa múddeli emes jáne biryńǵaı shıkizat eksportyna bet burǵan. Salalyq mınıstrliktiń aqparatyna qaraǵanda, 2021 jyly AÓK ónimi eksportyndaǵy jalpy kólemniń tek 37%-y ǵana óńdelgen taýarlardyń úlesine tıip otyr.
«Astyq óńdeý kásiporyndarynyń júktemesi nebári 33% qýatymen jumys istep keledi. Sonymen qatar, Qazaqstannyń astyq óńdeýshiler odaǵynyń málimetteri boıynsha, búginde elimizdegi árbir tórtinshi dıirmen ǵana jumys istep tur. Ósimdik sharýashylyǵy ónimderiniń eksporty ulǵaıyp jatqan kezde osyndaı qıyn jaǵdaı qalyptasyp otyr. Onyń kólemi 2021 jylmen salystyrǵanda 14%-ǵa ósken. Naqty taldaýdyń, tıisti qoldaý sharalary men qaýipterdi baǵalaýdyń joqtyǵynan, Qazaqstan kórshi elderdegi óńdeý salasyn damytýǵa yqpal etip otyr», - dedi Álibek Náýtıev Senattyń jalpy otyrysynda Úkimet basshysy Álıhan Smaıylovtyń atyna joldaǵan saýalynda.
Senator Aýyl sharýashylyǵy mınıstrligi 5 jyl boıy elimizdegi Astyq óńdeýdi qoldaý jáne damytý jónindegi jol kartasyn kelise almaı kele jatqanyn atap ótti. Naryq ımporttyq azyq-túlikke tolyp ketti. 2021 jylmen salystyrǵanda, ashytylǵan sút ónimderi, sút, et konservileri, irimshik jáne súzbe, sary maı óndirisi 4% ben 9% aralyǵynda tómendedi.
«Birinshi kezekte AÓK kólemderin ulǵaıtý men óńdeýge basty nazar aýdarylýy tıis. Bizdiń oıymyzsha, oǵan topyraqtyń qunarlyǵy men jem-shóp bazasy bar aımaqtardyń salaǵa beıimdelýin eskere otyryp, qol jetkizýge bolady. Sýbsıdııalaý tetikterin qaıta qaraý da mańyzdy. Taldaý kórsetkendeı, aýyl sharýashylyǵynyń odan ári damýy sharýashylyqtardyń uıymdasýyna baılanysty, al jeke qosalqy sharýashylyqtardy qoldaýdyń naqty áseri joq. Taýarlardyń ımporty ulǵaıa túsken kezde, naryqty qorǵaý qadamdaryna mańyz berý kerek. Sonymen qatar, otandyq ónimdi eksporttaý kezinde basqa elderdiń kóptegen kedergileri men tosqaýyldaryna jaýap retinde dál sondaı amal jasaý kerek», - dedi Álibek Náýtıev.
