Aýyl sharýashylyǵynda sarqyndy sýlardy paıdaǵa jaratý kerek - senator

ASTANA. QazAqparat – Parlament Senaty otyrysynda depýtat Janbolat Jórgenbaev sýaratyn sýdyń tapshylyǵy, aýyl sharýashylyǵy úshin qosymsha ylǵal kózderin paıdalaný, sondaı-aq Almaty jáne Jetisý oblystarynda sýarmaly jerlerdiń tıimdiligi men kólemin arttyrý problemalaryn kóterdi, dep habarlaıdy QazAqparat tilshisi.

Depýtat Jetisý oblysy Panfılov aýdanynyń ózenderinde vegetatsııalyq kezeńde sý qoımalaryn salý mańyzdy dep sanaıdy. Mundaı tásil aýdan aýyldarynyń sýarmaly egistigin qajetti sýmen qamtamasyz etýge múmkindik beredi.

Senatordyń pikirinshe, sýarmaly jerlerdi óńdeýdiń tıimdiligin arttyrý – elimizdegi azyq-túlik qaýipsizdigin nyǵaıtýdyń birden-bir joly. Sondyqtan, bul salany damytýǵa basymdyq berý asa mańyzdy.

«Osyǵan oraı, Qorǵas, Ósek, Tyshqan ózenderiniń múmkindikterin eskere otyryp, osy óńirde sý qoımalaryn salý máselesin qarastyryp, Balqash aýdanynda ornalasqan Aqdala sýarmaly alqabyndaǵy Tasmuryn magıstraldik kanalynyń boıyn shógindiler men sý ósimdikterinen, butalardan tazartý kerek. Sý zańnamasyn jetildirý, ıaǵnı bir sýarý kanalynda nemese onyń bóliginde ornalasqan eki jáne odan kóp jer paıdalanýshylarǵa tıesili sýarmaly alqaptardy sýarý úshin sýarý kanalyn paıdalanýdyń tártibin belgileıtin erejeni bekitý qajet. Sonymen qatar, sarqyndy sýlardy aýyl sharýashylyǵy maqsatynda paıdalaný jáne olardy esepteý ádistemesin ázirleý kerek», - dedi Janbolat Jórgenbaev saýal joldaı otyryp.