Aýyl sharýashylyǵyna salynǵan ınvestıtsııalar kólemi 54,8 paıyzǵa ulǵaıdy - Saparhan Omarov
Bul týraly Úkimet otyrysynda bıylǵy qańtar-naýryz aıyndaǵy áleýmettik-ekonomıkalyq damýdy talqylaý kezinde Aýyl sharýashylyǵy mınıstri Saparhan Omarov málim etti, dep habarlaıdy QazAqparat tilshisi.
«Bıylǵy qańtar-naýryz aılarynda jalpy aýyl sharýashylyǵy óniminiń kólemi 2,8 paıyzǵa ulǵaıyp, 591,3 mlrd teńgeni qurady. Bul ósim negizinen mal sharýashylyǵyndaǵy óndiris kóleminiń 3 paıyzǵa ulǵaıýy esebinen qamtamasyz etildi. Máselen, et óndirý kólemi tirideı salmaqta 5,1 paıyzǵa, sút 3,4 paıyzǵa ósti», - dedi mınıstr.
Onyń aıtýynsha, bul rette, 33,5 mlrd teńgege ósimdik sharýashylyǵy ónimderi óndirilip, naqty kólem ındeksi 100%-dy qurady. Bul kólem aýyl sharýashylyǵy daqyldaryn jabyq topyraqta (jylyjaıda) ósirý esebinen qamtamasyz etildi.
«Oblystar bólinisinde respýblıkalyq deńgeıden joǵary qarqyn 4 oblysta, ıaǵnı Aqmola (114,1%), Jambyl (103,8%), Qaraǵandy (103,5%) jáne Pavlodar (103,2%) oblystarynda baıqaldy», - dedi S. Omarov.
Onyń sózine qaraǵanda, kórsetilgen kezeńde tamaq ónimderin óndirý kólemi 3,3 paıyzǵa ósip, 487,2 mlrd teńgeni qurady. Bul rette, qyzylsha qantyn óndirý kóleminiń 28,3 paıyzǵa, sary maıdyń 26,8 paıyzǵa, jarmanyń 21 paıyzǵa, óńdelgen kúrishtiń 19,7 paıyzǵa, ósimdik maıynyń 17,5 paıyzǵa, irimshik pen súzbeniń 9,3 paıyzǵa, unnyń 9 paıyzǵa, óńdelgen súttiń 4,7 paıyzǵa artqany baıqaldy.
«Aýyl sharýashylyǵynyń negizgi kapıtalyna salynǵan ınvestıtsııalar kólemi 54,8 paıyzǵa ulǵaıyp, 112,3 mlrd teńgeni, tamaq ónimderi óndirisine salynǵan ınvestıtsııalar 86,8 paıyzǵa artyp, 24,3 mlrd teńgeni qurady», - dedi mınıstr.
