Aýyl sharýashylyǵyna memlekettik qoldaýdyń aýqymdylyǵyna qaramastan sala kórsetkishteri áli de tómen - A. Mamytbekov

ASTANA. QazAqparat - «Agrobıznes-2020» baǵdarlamasyna sáıkes, aýyl sharýashylyǵyn memlekettik qoldaý kólemi júıeli túrdi júrgizilýde. Máselen, 2008 jylǵy 41,4 mlrd. teńgeden bıylǵy jyly 177 mlrd. teńgege deıin kóterildi. Bul týraly búgin Májiliste ótken Úkimet saǵatynda Aýyl sharýashylyǵy mınıstri Asyljan Mamytbekov málim etti.

Vedomstvo basshysynyń aıtýynsha, salaǵa memlekettik qoldaýdyń jańa quraldary engizilýde. Máselen, tıimdi sýbsıdııanyń normatıvteri joǵarlap, tıimsiz sýbsıdııalar normatıvteri tómendegen. «Alaıda, qoldaýdyń aýqymdylyǵyna qaramastan, mal sharýashylyǵynyń ónimdiligi men ósimdik sharýashylyǵynyń negizgi túsimder kórsetkishteri álemdik kórsetkishterge qaraǵanda áli de tómen bolyp otyr.Bul degen sóz eńbek ónimdiligi men salanyń tıimdiligi boıynsha áli de joǵary deńgeıge kóterile almaı otyrǵanymyzdy bildiredi», - dedi A. Mamytbekov.

Bul rette mınıstr kórsetkishterge qatysty máselede klımattyq jáne ekonomıkalyq erekshelikterdi esepke alý kerektigin, sondaı-aq tehnologııalardyń qoljetimdiligi mańyzdy ról atqaratynyn atap ótti. Degenmen, mınıstrdiń sózine qaraǵanda, Qazaqstan men klımattyq uqsas memlekettermen salystyrǵanda da bizdiń elimizdegi kórsetkishter mardymsyz bolyp tabylady.

«Álsiz ósimdiliktiń negizgi sebepteriniń biri - bizdiń esepteýimizshe, sýbsıdııanyń basym bóligi, sonyń ishinde 70 mlrd teńgeden astamy aýyl sharýashylyǵy taýarlaryn óndrýshiler úshin ózderiniń tıimdiligin, rentabeldiligin esh yntalandyrmaıdy. Sýbsıdııalardyń ónimniń ózindik qunyndaǵy úlesiniń joǵary bolýy, taýar óndirýshilerdiń joǵaltqan tabysyna ótemaqy sekildi bolyp ketedi. Aıtalyq, mal sharýashylyǵynda sýbsıdııanyń úlesi ónimniń ózindik qunynyń12-den 50 paıyzyna deıin qubylady», - dedi vedomstvo basshysy.