Aýyl sharýashylyǵyna qomaqty qarajat bólingenimen, odan nátıje joq - J. Dúısebaev
Búgin Parlament Májilisiniń jalpy otyrysynda Úkimet basshysynyń atyna saýal joldaǵan depýtat Jeksenbaı Dúısebaev osylaı málim etti.
«Halqymyzdyń 45 paıyzynan astamy aýylda turatynyn, jer kólemi boıynsha álemde 9 orynda turǵanymyzdy, onyń ishinde jaıylymdyq kólemi boıynsha álemde 5 orynda turǵanymyzdy eskersek búginde aýyl máselesi, onyń ishinde aýyl sharýashylyǵyn damytý eń bir ózekti jaǵdaı. Soǵan qarmastan qazirgi ýaqytta azyq-tilik ónimderiniń 60 paıyzyna jýyǵyn shetelden aldyryp, ıaǵnı ımportqa táýeldi bolyp otyrǵanymyz árıne ókinishti. Bul degenińiz bólinip jatqan qomaqty qarjylardyń aýyldaǵy sharýashylyq ujymdarǵa der kezinde jetpeıtindiginde. Tipti keıbir belgisiz sebeptermen bıýdjetten bólingen qarjylardyń qumǵa sińgen sýdaı orta jolda qalyp, sonyń saldarynan túpkilikti nátıjege qol jetkizbeı jatqanymyzda», - dep atap ótti J. Dúısebaev.
Máselen, depýtattyń aıtýynsha, bıylǵy jylǵy bıýdjetten aýyl sharýashylyǵyn damytýǵa 318 mld. teńge qarjy bólinse, onyń 80 mld. teńgesi egindi alqaptardy damytýǵa kózdelgen. Ókinishtisi osyndaı qomaqty qarjy bólingegine qaramastan mal sharýashylyǵyna sýbsıdııalar tek 7 aı ótkennen keıin ǵana qolǵa tıedi. Onda da sharýalardyń barlyǵy birdeı buǵan qol jetkizip otyrǵan joq.
«Al egin alqabynda júrgen sharýa qojalyqtary sýbsıdııany osy kúnge deıin ala almaı júrgendikteri tań qaldyrady. Qarjy bar da, nátıje joq. Osyǵan taǵy bir dálel, 2013 jylǵy bıýdjette aýyl sharýashylyǵyna bólingen qarjy 239 mld. teńge bolsa, onyń egin alqabyna tıesilisi 40-aq mlrd. teńge ǵana. Bul degenińiz byltyrǵy bıýdjetpen salystyrǵanda 80 mlrd. tengege jýyq qarjy kemigenin kórsetedi, onyń ishinde egistikke bólingen qarajat eki esege az bolyp otyr. Bıylǵy qýańshylyqty eskersek, kerisinshe egin alqabyna qarjy eki ese kóp bóliný kerek edi», - deıdi depýtat.