Aýyl sharýashylyǵyna kadrlardy tek mamandandyrylǵan joǵary oqý oryndary daıarlaýy kerek - A.Bulashev
ASTANA. Qańtardyń 21-i. QazAqparat /Gúlmıra Álıakparova/ - Aýyl sharýashylyǵyna kadrlardy tıisti mamandyqtar boıynsha ǵylymı áleýeti, materıaldyq-tehnıkalyq bazasy bar joǵary oqý oryndary ǵana daıyndaýy kerek.
Bul pikirin búgin Astanada «Qazaqstan Respýblıkasy agrarlyq ýnıversıtetteriniń kúnderi» aıasynda ótken májiliste S.Seıfýllın atyndaǵy Qazaq agrotehnıkalyq ýnıversıtetiniń rektory Aıtbaı Bulashev bildirdi, dep habarlaıdy QazAqparat.
A.Bulashevtyń paıymdaýynsha, aýyl sharýashylyǵyna kadrlardy ǵylymı áleýeti, materıaldyq-tehnıkalyq bazasy bar joǵary oqý oryndary ǵana daıyndaýy kerek. Al Qazaqstanda aýyl sharýashylyǵy mamandaryn daıarlaıtyn ýnıversıtetterdiń uzyn sany 23-ke jetip otyrǵan qazirgi jaǵdaıda, jańadan ashylǵan jekemenshik joǵary oqý oryndary agronomdar men zootehnıkterdi, tipti veterınarııa mamandyqtaryn oqytýǵa lıtsenzııalardy ońaı alyp otyrǵandyǵy agrarlyq salada eńbek etetinderge túsinbeýshilik týǵyzýda.
Rektordyń aıtýynsha, aýyl sharýashylyǵy jaqsy damyǵan Ulybrıtanııada mal dárigerlerin tek tórt ýnıversıtet qana daıyndaıtyn bolsa, Qazaqstanda ondaı ýnıversıtetterdiń sany búgingi kúni 8-ge jetken.
A.Bulashev buny - mamandandyrylmaǵan oqý oryndaryna lıtsenzııalardy ońdy-soldy taratýdy bylaı qoıǵanda - memlekettiń bilim granttaryn talan-tarajǵa salý dep túsinetindigin jetkizdi. «Granttardyń osyndaı talan-tarajǵa salynýy oqý toptaryn tolyqqandy qalyptastyrýǵa múmkinshilik bermeı, bilim sapasyna keri áserin tıgizýde», - dep atap ótti rektor.
