Aýyl sharýashylyǵyna ınvestıtsııalar kólemi 3,2 trln teńgege jetedi - mınıstr
«Búginde bizdiń mınıstrlik agroónerkásiptik keshendi damytý jónindegi júıeli jumysty atqaryp keledi. Syn-qaterler men kúrdeli mán-jaılardy eskere otyryp, salany reformalaý men qaıta qurý júrip jatyr. Otandyq aýyl sharýashylyǵy salasy aldyndaǵy basty mindetterge toqtalyp ótsem. Aldymen, eńbek ónimdiligin 3 esege arttyrý (aýyl sharýashylyǵymen aınalysatyn árbir sharýaǵa 3,4 mln teńgeden 9,3 mln teńgege deıin). Kelesi agroónerkásiptik kesheni (AÓK) óniminiń eksportyn 3 esege ulǵaıtý (3,5 mlrd AQSh dollarynan 9,9 mlrd-qa)», - dedi Erbol Qarashókeev Islam azyq-túlik qaýipsizdigi uıymynyń uıymdastyrýymen Syrtqy mınıstrliginde ótken semınarda.
Osylaısha onyń aıtýynsha, AÓK eksportynyń jalpy kólemi 70%-ǵa artpaq.
«Barlyq azyq-túlik boıynsha kem degende 90%-ǵa onyń ishinde qantty qospaǵanda, 5 ımportqa táýeldi taýar boıynsha 100% ózimizdi qamtamasyz etýge qol jetkizilmek. Budan basqa, aýyl sharýashylyǵy salasyna ınvestıtsııalar kólemin 4 ese ósýin qamtamasyz etip, ol 3,2 trln teńgege deıin jetkiziledi. Atalǵan maqsattarǵa qol jetkizý úshin adamı áleýetke de, ekonomıka ınfraqurylymyna da ınvestıtsııany keńinen tartý qajet», - deıdi vedomstvo basshysy.
Aıta keteıik, Syrtqy ister mınıstrliginde Islam azyq-túlik qaýipsizdigi uıymynyń uıytqy bolýymen «Aýyl sharýashylyǵyna ınvestıtsııa salýǵa Sýkýk» atty semınar ótti. Atalǵan sharaǵa quzyrly memlekettik organdar ókilderi, sala sarapshylary men sheteldik meımandar qatysty.
