Aýyl sharýashylyǵyna ınnovatsııalyq tehnologııalardy engizý kerek - Nurlan Nyǵmatýlın
NUR-SULTAN. QazAqparat - Aýyl sharýashylyǵy salasy básekege qabiletti bolýy úshin turaqty túrde jańa ınnovatsııalyq tehnologııalardy engizý kerek. Bul týraly Parlament Májilisinde et jáne sút ónimderin óndirýdi, eksporttaýdy damytý taqyrybyndaǵy parlamenttik tyńdaýda palata spıkeri Nurlan Nyǵmatýlın málim etti, dep habarlaıdy QazAqparat tilshisi.
«Elimizdiń ekonomıkasy men halqymyzdyń áleýmettik jaǵdaıy úshin aýyl sharýashylyǵy salasynyń mańyzy óte zor. Bul elimizdiń damýynyń strategııalyq baǵyttarynyń biri. Elbasy Táýelsizdik alǵan kúnnen bastap osy salany damytýǵa zor kóńil bólip otyr. Sonyń nátıjesinde tıisti qarjy bólinip, atalǵan baǵyt jyl saıyn serpindi damyp kele jatyr. Joldaýda agrarlyq ónimniń eksportyn eki jarym esege deıin arttyrý mindeti júkteldi. Ol ne beredi? Bul tabıǵı taza ónimder arqyly otandyq ekonomıkamyzdy kúsheıtýmen qatar, álemdik eksportty baǵyndyrýǵa jol ashady», - dedi N. Nyǵmatýlın.
Osy oraıda ol zańnama jaǵynan qamtamasyz etý úshin Parlament negizgi zańdardy qabyldaǵanyn eske saldy. Qazirgi ýaqytta 2017-2021 jyldarǵa arnalǵan arnaıy baǵdarlama júzege asyrylyp jatyr.
«Sondyqtan búginde memleket aýyl sharýashylyǵy salasyna barlyq jaǵdaı jasap otyr. Endi ónimniń sapasyn, qaýipsizdik jáne ekologııalyq tazalyqty saqtaı otyryp, tıisti sharalardy qolǵa alýymyz qajet. Osy jolda mal sharýashylyǵynyń orny bólek. Sapaly azyq-túlik boıynsha bizdiń elimizdiń ózin de qamtamasyz etetin, eksportqa da shyǵatyn múmkindigi óte zor. Sonyń ishinde et jáne sút ónimderi basym baǵyttardyń biri. Osyǵan oraıda Elbasy tapsyrmasyna sáıkes, taza tabıǵı ónimderdi arttyrýdyń barlyq joldary kórsetildi. Endigi maqsatymyz - olardy tıimdi ári nátıjeli júzege asyrý. Osy oraıda halyqty taza et pen sút ónimderimen qamatamasyz etý úshin agrarlyq saladaǵy tsıfrlandyrý jumystarynyń mańyzdylyǵy da óte zor. Sebebi aýyl sharýashylyǵy salasy básekege qabiletti bolýy úshin turaqty túrde jańa ınnovatsııalyq tehnologııalardy engizý qajet», - dedi Májilis tóraǵasy.
Taratylǵan málimetke qaraǵanda, Qazaqstanda mal sharýashylyǵyn damytý aıasynda 2018 jyly iri qara mal sany 2013 jylmen salystyrǵanda 21,9 paıyzǵa artty. Sonymen qosa, et pen et konservilerin óndirý 19,9 paıyzǵa tómendeýi baıqaldy.
