Aýyl sharýashylyǵyn jalǵan kooperatıvterden tazartý kerek - mınıstr
«Aýyl sharýashylyǵy kooperatsııalaryn biz erekshe talqyǵa salýymyz kerek. Ózderińiz biletindeı, qazirgi qoldanystaǵy aýyl sharýashylyǵy kooperatsııalary jeke qojalyqqa negizdelgen. Jalpy, jeke qojalyq kooperatsııalary áleýmettik joba retinde bolýy múmkin. Biraq, bul jaǵdaıda biz ónimdilikke qol jetkize almaımyz. Sondyqtan, eńbek ónimdiligin tek qana iri fermerler men sharýalardyń kooperatsııalary arqyly qamtamasyz ete alamyz. ıAǵnı, kooperatsııanyń negizgi bıznesi bola alatyn sharýashylyqtar arqyly tabysqa jete alamyz», - deıdi mınıstr.
Ómirzaq Shókeevtiń aıtýynsha, jeke qojalyqtardyń kooperatsııasynyń sútti baǵytqa alǵa jyljyǵany tıimdirek.
«Bizge taldaý jasaý kerek. Qazir jumys toby qurylyp, óńirlerde Prezıdent Ákimshiliginiń, bizdiń jáne Eńbek jáne halyqty áleýmettik qorǵaý mınıstrliginiń ókilderi bar komıssııa jumys júrgizip jatyr. Komıssııa óziniń jumysyn osy aıdyń sońyna qaraı aıaqtaıdy. Bálkim, kooperatıvterge arnalǵan Úkimette úlken keńes ótedi», - deıdi ol.
Mınıstr sonymen qatar, aýyl sharýashylyǵy kooperatsııalaryna kelgende suraqtyń birshama qordalanyp qalǵanyn tilge tıek etti.
«Osynyń bárin retke keltirý kerek. Bizdiń oıymyzsha, bul baǵdarlamany ary qaraı jalǵastyryp, ońtaılandyrýǵa tıispiz. Qoldan jasalǵan (jalǵan) kooperatıvter, formaldy túrde qurylǵan kooperatıvter jeterlik. Olardyń barlyǵyn tazartý kerek. Shynynda jumys istep júrgenderdiń sapasyn arttyrǵan abzal. Atalǵan kooperatıvterdiń jumysyna baǵa berip otyratyn ındıkatorlardy engizgen durys», - dep túıdi mınıstr.