Aýyl sharýashylyǵyn sý únemdeý tehnologııalarymen damytý kerek - Álıhan Smaıylov

NUR-SULTAN. QazAqparat – QR Premer-Mınıstri Álıhan Smaıylov jumys saparymen Pavlodar oblysyna baryp, jergilikti kásipkerlermen aýyl sharýashylyǵy jáne ónerkásiptik óndiris salalaryn damytý jóninde keńes ótkizdi, dep habarlaıdy QazAqparat Úkimettiń baspasóz qyzmetine silteme jasap.

Álıhan Smaıylov eń aldymen, memleketten qoldaý alyp, 1 700 ga jerde zamanaýı sýarý tehnologııalaryn qoldana otyryp, kartop ósirýmen aınalysatyn sharýa qojalyǵyna bardy. Sonymen qatar, kásiporynda qýattylyǵy 10 myń tonna kókónis qoımasy salyndy, sondaı-aq qazirgi ýaqytta jylyna 10 mln tonna sút óndiretin taýarly-sút fermasynyń qurylysy júrip jatyr. Jobaǵa salynǵan ınvestıtsııalardyń jalpy kólemi 11 mlrd teńge boldy, onyń 7,6 mlrd teńgesi «Agrarlyq nesıe korporatsııasy» jelisi boıynsha jeńildikpen nesıelendirý jáne 2,7 mlrd teńgesi sýbsıdııalaý esebinen salyndy. Sharýashylyqtyń jumysymen tanysqan Úkimet basshysy mundaı jobalardy basqa óńirlerde de iske asyrý qajettigin atap ótti.

«Qazirgi azyq-túlik qaýipsizdigi máseleleriniń shıelenisýi jáne tamaq ónimderi baǵasynyń ósýi aıasynda búkil álemde zamanaýı sý únemdeý tehnologııalary qoldanylatyn aýyl sharýashylyǵy jobalaryn damytýǵa basa nazar aýdarý kerek. Mundaı jobalardy basqa óńirlerde de qolǵa alý qajet dep sanaımyn. Memlekettik qoldaý arqasynda bul úlken áleýmettik jáne ekonomıkalyq nátıje bermek», - dedi Premer-Mınıstr.

Osy jerde Álıhan Smaıylov óńirdegi aýyl sharýashylyǵy qurylymdarynyń basshylarymen kezdesý ótkizdi, onda tuqym ósirý sharýashylyǵyn sýbsıdııalaý, aýyl sharýashylyǵy tehnıkasy men mıneraldyq tyńaıtqyshtardy satyp alý, mal sharýashylyǵyn damytý jáne qus sharýashylyǵyn qoldaý máseleleri kóterildi. Úkimet basshysy kóterilgen árbir másele boıynsha egjeı-tegjeıli túsinikteme berip, oblys basshylyǵyna olardy baqylaýda ustaýdy tapsyrdy.

Sondaı-aq, Premer-Mınıstr jylyna 250 myń tonna alıýmınıı óndiretin Qazaqstan elektrolız zaýytynyń qyzmetimen tanysty. Bul zaýyt ónimdi ishki naryqqa baǵyttaıdy, sondaı-aq Túrkııa, Nıderlandy, Brazılııa, AQSh, Italııa, Bolgarııa, Polsha, Norvegııa jáne basqa da birqatar elge eksporttaıdy. Kásiporynda Álıhan Smaıylov iri ónerkásiptik kásiporyndardyń basshylarymen keńes ótkizdi. Kezdesýde zamanaýı óndiris tehnologııalaryna kóshý, qorshaǵan ortany qorǵaý, atmosferaǵa shyǵaryndylardy azaıtý jáne atmosferalyq aýanyń sapasyna avtomatty túrde monıtorıng jasaý júıesin engizý máseleleri talqylandy. Premer-Mınıstr iri kásiporyndarmen birlesip, Pavlodar qalasynyń aınalasynda «Jasyl beldeý» qurý máselesin pysyqtaý qajet ekenin, bunyń qalanyń ekologııasyn edáýir jaqsartýǵa múmkindik beretinin atap ótti.

Úkimet basshysy ár jyldary «Bıznestiń jol kartasy» jáne «Qarapaıym zattar ekonomıkasy» baǵdarlamalary boıynsha memlekettik qoldaýǵa ıe bolǵan arhıtektýralyq shynypaketter men shynydan jasalǵan ınterer zattaryn shyǵaratyn kásiporynǵa bardy. Kompanııa ónimderi ishki naryqta jáne kórshi memleketterde satylady. Álıhan Smaıylov qurylys salasyn damytý aıasynda qurylys materıaldaryna qajettilik artyp kele jatqanyn atap ótti. Osyǵan baılanysty Úkimet osy óndiristik baǵytty barynsha qoldaýǵa ázir.

Foto: primeminister.kz