Aýyl sharýashylyǵyn qoldaý sharalaryn ulǵaıtý qajet- mınıstrlik

NUR-SULTAN. QazAqparat – Qazaqstan aldaǵy ýaqytta agroónerkásip kesheninde memlekettik qoldaý sharalaryn kúsheıtip, naryqtaǵy kóleńkeli falsıfıkatorlardy ysyrýy tıis. Otandyq ónimdi qoldaý sharalaryna qatysty QR Aýyl sharýashylyǵy mınıstrligi osyndaı qaǵıdat ustanyp otyr, dep habarlaıdy QazAqparat tilshisi.

QR Aýyl sharýashylyǵy birinshi vıtse-mınıstri Aıdarbek Saparovanyń aıtýynsha, 2020 jyldyń 1 qańtaryndaǵy jaǵdaı boıynsha Qazaqstanda aýyl sharýashylyǵynyń 776 ınvestıtsııalyq jobadan turatyn ınvestıtsııalyq portfeli 611 mlrd teńgeni qurap otyr.

«2019 jyldyń basty jumys qorytyndysy retinde 172 myń bas iri qarany satyp alynyp, 10 sút ónimderi fermasynyń ashylǵanyn atap ótýge bolady. Sonymen birge, byltyr jylyna 36 myń tonna taýyq etin óndiretin qus sharýashylyǵy salasynda eki joba iske asty. 11 iri jylyjaı salynyp, 98,5 mlrd teńgege 5893 dana tehnıka berildi», - dedi ol Parlamen Senatynda ótip jatqan dóńgelek ústelde.

Vıtse-mınıstr áıtse de qazir Eýrazııalyq ekonomıkalyq odaqtaǵy elderdegi seriktesterimizden qaraǵanda Qazaqstanda memlekettik qoldaý deńgeıi tómen ekenin aıtady. Máselen, Belarýs Jalpy ishki ónimniń 8,1 paıyzyn, Reseı 6,3 paıyzyn aýyl sharýashylyǵyn qoldaýǵa jumsaıdy. Al bizde Qazaqstanda bul kórsetkish 5 paıyzdy ǵana quraıdy.

«Kórshi eldermen salystyra otyryp, keltirilgen málimetterge súıensek, Qazaqstan AÓK salasyn qoldaý jaǵynan olardan qalyp bara jatyr. Osy sebepti, reseılik jáne ózbekstandyq aýyl sharýashylyǵy ónimderi bizdikinen qaraǵanda básekege qabiletti. Osyǵan baılanysty Qazaqstan bul baǵytta memlekettik qoldaý sharalaryn kúsheıtip, kórshi elderdiń tájirıbesine súıenip, qoldaý mehanızmderiniń tizimin uzartýy kerek. Sonymen qatar, memlekettik qoldaý sharalaryn ulǵaıta otyryp, Qazaqstanda óndirilgen ónimdi ótkizý isine myqtap kirisý kerek. Ol úshin naryqtaǵy ımporttyq falsıfıkatorlardy ysyrǵan abzal. Áıtpese, bizdiń isimizdiń bári nátıjesiz aıaqtalýy múmkin», - dedi ol.