«Aýyl sharýashylyǵyn qarjylaı qoldaý qory» bıznesti qoldaý boıynsha ótinishter qabyldaı bastady
Baǵdarlama aıasynda qarjylaı qoldaýdyń baǵyty retinde - shaǵyn kásipkerlikti shaǵyn nesıeleý baǵyty bekitilgen. Baǵdarlamanyń maqsaty - aımaqtyq kásipkerliktiń turaqty jáne balanstandyrylǵan ósýi men istep jatqan jáne jańa jumys oryndaryn ashýdy qamtamasyz etý. Bul baǵytta bıýdjetten 2 mlrd. 647 mln. teńge bólindi. 2017-2018 jyldary da osy kólemde qarjylandyrý josparlanǵan.
«Nesıeleý baǵdarlamasy Qazaqstannyń barlyq oblystarynda júzege asyrylady. Bólingen qarjy monoqalalar, shaǵyn qalalar, aýyldyq eldi-mekenderdegi shaǵyn qarjy uıymdaryn nesıeleý arqyly shaǵyn bıznes sýbektilerin shaǵyn nesıeleýge baǵyttalady. Nesıeleý baǵdarlamasynyń talaptarany sáıkes, qaryzdar shaǵyn nesıe uıymdaryna odan ári óz jobalaryn júzege asyryp jatqan nemese asyrýdy josparlaǵan kásipkerlerge baǵyttalady», - deıdi «Aýyl sharýashylyǵyn qarjylaı qoldaý qory» AQ Basqarma tóraǵasynyń orynbasary Almas Taýbaev.
Onyń aıtýynsha, túpki qaryz alýshylarǵa beriletin shaǵyn nesıeler - óz isin uıymdastyrý nemese keńeıtý jáne aınalymdaǵy kapıtaldy salalyq shekteýsiz tolyqtyrýǵa jumsalmaq.
«Qaryz alatyn shaǵyn qarjy uıymyna beriletin qaryzdyń eń joǵary somasy - 350 mln. teńge, bir qaryz alýshyǵa - 10 mln. teńgeden aspaıdy. Shaǵyn qarjy uıymy úshin bekitilgen syıaqy ústemesi - jyldyq 4%, jyldyq tıimdi syıaqy ústemesi - 4,5% aspaıdy. Al túpki qaryz alýshylar úshin nomınaldy ústeme - jyldyq 12% aspaıdy. Shaǵyn nesıe uıymy jáne túpki qaryz alýshylar úshin qaryz ben shaǵyn nesıeniń merzimi - 54 aıdan, aınalymdaǵy kapıtaldy tolyqtyrýǵa bekitilgen merzim - 36 aıdan aspaıdy», - delingen baspasóz baıanynda.
Jalpy, 2006 jyldan bastap, «Aýyl sharýashylyǵyn qarjylaı qoldaý qory» AQ shaǵyn nesıe (shaǵyn qarjy) uıymdaryn qoldaýǵa 10 mlrd. 226 mln. teńge bóldi. Bul qarjydan túpki qaryz alýshylarǵa 23 myńǵa jýyq shaǵyn nesıe berildi.
